Seçki xəbərləri
YAP-ın bütün uğurlarının arxasında xalqın inamı dayanır
Azərbaycan Respublikasında 2025-ci il yanvarın 29-na təyin edilmiş bələdiyyə seçkilərinin təbliğat-təşviqat mərhələsi çərçivəsində Ağcabədi rayonu, Qaravəlli bələdiyyəsi üzrə Yeni Azərbaycan Partiyasının (YAP) namizədlərinin seçicilərlə görüşü keçirilib.
YAP Ağcabədi rayon təşkilatının sədr müavini Nazim Bünyatov Yeni Azərbaycan Partiyasının ölkəmizin inkişafı istiqamətində önəmli işlər gördüyünü və mühüm nailiyyətlərə imza atdığını deyib. Onun sözlərinə görə, zamanın tələbi, xalqın istəyi ilə yaranan və qısa müddət ərzində ümumxalq partiyasına çevrilən Yeni Azərbaycan Partiyasının bütün uğurlarının arxasında xalqın inamı və bu inamdan irəli gələn dəstəyi dayanır.
Bələdiyyə üzvlüyünə namizədlər Sərraf Nağıyev, Zahir Balakişiyev, Nazim Qənbərov, Cövdət Qarayev, Azər Şiraslanzadə, Əkbər Sadıqov, Əfqan Həsənov, Qaraş Vəliyev və Anar Quliyev YAP-ın seçki proqramı haqqında ətraflı məlumat veriblər. Onlar seçiciləri bələdiyyə seçkilərində fəal iştirak edərək müasir, qalib və qüdrətli Azərbaycanın inkişafı naminə Yeni Azərbaycan Partiyasının namizədlərinə səs verməyə çağırıblar.
Seçicilər Əli Mehtiyev, Şahin Mamedov, Ərkinaz Quliyeva, Mürsəl Quliyev və digərləri bələdiyyə seçkilərində fəal iştirak edəcəklərini və YAP-ın namizədlərini dəstəkləyəcəklərini qeyd ediblər.
Qeyd edək ki, Ağcabədi bələdiyyəsi üzrə namizəd Samirə Xudiyeva seçicilərlə məhəllə görüşləri keçirib.
