Seçki xəbərləri
YAP-ın tarixinə yeni bir siyasi nailiyyət yazılacaq
Azərbaycan Respublikasında 2025-ci il yanvarın 29-na təyin edilmiş bələdiyyə seçkilərinin təşviqat mərhələsi çərçivəsində Xızı rayonu, Xızı və Giləzi bələdiyyələri üzrə Yeni Azərbaycan Partiyasının (YAP) namizədlərinin seçicilərlə görüşü keçirilib.
YAP Xızı rayon təşkilatının sədri Ayaz Quliyev bildirib ki, digər seçkilər kimi, bələdiyyə seçkiləri də beynəlxalq standartlara və demokratik prinsiplərə uyğun keçiriləcək: “YAP yarandığı vaxtdan iştirak etdiyi bütün seçkilərdə böyük uğurlar qazanıb. Əminik ki, 29 yanvar seçkiləri də YAP-ın tarixinə yeni bir siyasi nailiyyət olaraq yazılacaq”.
Təbliğat qrupunun üzvü Bəhdaş Nəbiyev, bələdiyyə üzvlüyünə namizədlər Xaliq Qasımov, Anar Mahmudlu və Əziz Məmmədov qarşıda duran vəzifələrin uğurla icrası üçün daha genişmiqyaslı addımların atılmasının zəruriliyini vurğulayıblar.
Natiqlər yeni hədəflərə nail olmaq üçün seçiciləri bələdiyyə seçkilərində YAP-ın namizədlərinə səs verməyə çağırıblar.
