Seçki xəbərləri
Milli hədəflərimiz uğrunda
Azərbaycan Respublikasında 2025-ci il yanvarın 29-na təyin edilmiş bələdiyyə seçkilərinin təşviqat mərhələsi çərçivəsində Bakı şəhəri, Yasamal rayonu, Yasamal bələdiyyəsi üzrə Yeni Azərbaycan Partiyasının (YAP) namizədlərinin seçicilərlə görüşü keçirilib.
Görüşdə giriş sözü ilə çıxış edən YAP Yasamal rayon təşkilatının sədri Bəxtiyar Nəbiyev bələdiyyələrin fəaliyyəti ilə bağlı ətraflı məlumat verib. Qeyd olunub ki, yerli özünüidarəetmə orqanları demokratik təsisiat modelidir, vətəndaş cəmiyyətinin bir formasıdır. Bələdiyyələr yerli məsələlərin həllində və sosial layihələrin həyata keçirilməsində mühüm rol oynayır.
Təşviqat qrupunun üzvləri Rəna Mirzəzadə, Lalə Bayramova və Şölət Zeynalov, bələdiyyə üzvlüyünə namizəd Bəhram Şeydayev Yeni Azərbaycan Partiyasının seçki proqramından söz açıblar. Vurğulanıb ki, YAP indiyədək iştirak etdiyi bütün seçkilərdə inamlı qələbələr qazanıb.
Seçicilər Babacan Axundov, Sevinc Ağalarova və başqaları bələdiyyə seçkilərində YAP-ın namizədlərinə səs verəcəklərini vurğulayıblar.
Qeyd edək ki, həmin gün YAP-ın namizədləri bir sıra ünvanlarda seçicilərlə məhəlli görüşlər də keçiriblər.
