Seçki xəbərləri
Ağcabədi seçiciləri YAP-ın namizədlərinə səs verəcəklər
Azərbaycan Respublikasında 2025-ci il yanvarın 29-na təyin edilmiş bələdiyyə seçkilərinin təşviqat mərhələsi çərçivəsində Ağcabədi rayonu, Ağcabədi, Nəcəfqulubəyli, Şənlik və Aşağı Avşar bələdiyyələri üzrə Yeni Azərbaycan Partiyasının (YAP) namizədlərinin seçicilərlə görüşləri keçirilib.
YAP Ağcabədi rayon təşkilatının məsləhətçisi Elşən Səfərov qeyd edib ki, ölkəmiz Prezident İlham Əliyevin liderliyi ilə müasir dövlətçilik tarixinin möhtəşəm nailiyyətlərlə zəngin olan şərəfli bir dönəminə yekun vuraraq yeni dövrə qədəm qoyub. O, YAP-ın seçki proqramı haqqında məlumatları diqqətə çatdıraraq partiyanın xalqın dəstəyi ilə növbəti qələbəyə imza atmaq əzmində olduğunu bildirib.
Bələdiyyəsi üzvlüyünə namizədlər Vüsalə Qurbanova, Möhübbət İsmayılov və Akif Zülfüqarov YAP-ın keçdiyi şərəfli yoldan söhbət açıblar. Onlar çıxışlarında bildiriblər ki, bələdiyyə üzvü seçildikləri tədqirdə, “Bələdiyyələrin statusu haqqında” qanunun tələblərini əsas götürərək, üzərlərinə düşən vəzifələrin öhdəsindən layiqincə gəlmək üçün bütün qüvvə və bacarıqlarını sərf edəcəklər.
Keçirilən görüşlərdə seçicilər Maarif Qurbanov, Süsən Həziyeva, Sürət Rüstəmov, Qaryağdı Məhərrəmov və digərləri çıxış edərək, bələdiyyə seçkilərində YAP-ın namizədlərinə üstünlük verəcəklərini bildiriblər.
Qeyd edək ki, YAP-ın namizədləri seçicilərlə məhəllə görüşləri də keçiriblər.
