Seçki xəbərləri
Xalqın dəstəyi ilə növbəti qələbəyə
Azərbaycan Respublikasında 2025-ci il yanvarın 29-na təyin edilmiş bələdiyyə seçkilərinin təşviqat mərhələsi çərçivəsində Saatlı rayonu, Varxan bələdiyyəsi üzrə Yeni Azərbaycan Partiyasının (YAP) namizədlərinin seçicilərlə görüşü keçirilib.
YAP Saatlı rayon təşkilatının sədri Elşən Əzizov bildirib ki, Prezident İlham Əliyevin qətiyyətli siyasəti sayəsində bu gün müstəqil Azərbaycan Cənubi Qafqazda lider, dünyada qüdrətli dövlət kimi tanınır: “Ölkəmizin beynəlxalq müstəvidə nüfuzunun əhəmiyyətli dərəcədə artması, mövqeyinin möhkəmlənməsi, söz sahibinə çevrilməsi də məhz Prezidentimizin, YAP Sədri İlham Əliyevin adı ilə bağlıdır”. O, Prezident İlham Əliyevin qayğısı nəticəsində Azərbaycanda bələdiyyə institutlarının son illərdə böyük inkişaf yolu keçdiyini də bildirib.
Seçki qərargahının üzvləri Xanhüseyn Əhmədov, Lətif Şimşəkov, bələdiyyə üzvlüyünə namizədlər Atakişi Əliyev, Əlxuda Talıbov və Bəxtiyar Əmraslanov ölkəmizdə bələdiyyələrin inkişafı istiqamətində atılmış addımlardan danışıblar. Bildiriblər ki, bələdiyyələrin ölkəmizin ictimai-sosial, iqtisadi həyatında rolu önəmlidir.
Seçicilər isə çıxışlarında YAP-ın siyasətini dəstəklədiklərini və bələdiyyə seçkilərində partiyanın namizədlərinə səs verəcəklərini vurğulayıblar.
Qeyd edək ki, YAP Saatlı rayon təşkilatının sədri Elşən Əzizov təşviqat kampaniyası çərçivəsində məhəllə görüşü də keçirib və seçiciləri YAP namizədlərinə səs verməyə dəvət edib.
