Seçki xəbərləri
YAP seçkilərə qələbə əzmi və geniş sosial baza ilə gedir
Azərbaycan Respublikasında 2025-ci il yanvarın 29-na təyin edilmiş bələdiyyə seçkilərinin təşviqat mərhələsi çərçivəsində Zaqatala rayonu, Gözbarax bələdiyyəsi üzrə Yeni Azərbaycan Partiyasının (YAP) namizədlərinin seçicilərlə görüşü keçirilib.
Görüşdə giriş sözü ilə çıxış edən YAP Zaqatala rayon təşkilatının sədri Fərid Ramazanov bildirib ki, Yeni Azərbaycan Partiyasının üzvlərinin sayının gündən-günə artması və sosial bazasının daha da möhkəmlənməsi xalqın Ümummilli Lider Heydər Əliyevin ideyalarına sadiqliyinin, Prezident İlham Əliyevin siyasətinə birmənalı dəstəyinin bariz nümunəsidir. Təşkilat sədri yanvarın 29-da keçiriləcək bələdiyyə seçkilərinin tam şəffaf və demokratik şəraitdə baş tutması üçün hər cür şəraitin yaradıldığını diqqətə çatdırıb.
Seçki qərargahının üzvü Tahir Məmmədov qeyd edib ki, bələdiyyələrin islahatlar yolu ilə təkmilləşdirilməsi yerli idarəetmə sisteminin daha müstəqil və çevik hala gətirilməsinə imkan yaradacaq. Nəticədə, əhalinin müxtəlif ehtiyaclarına daha çevik və effektiv cavab verən bir yerli idarəetmə strukturu formalaşacaq.
Seçicilər YAP-ın fəaliyyəti dəstəklədiklərini və bələdiyyə seçkilərində partiyanın namizədlərinə səs verəcəklərini vurğulayıblar.
