Seçki-2024
YAP-ın qazandığı qələbələr yüksək etimadın göstəricisidir
Azərbaycan Respublikasında 2025-ci il yanvarın 29-na təyin edilmiş bələdiyyə seçkilərinin təşviqat mərhələsi çərçivəsində Şəmkir rayonu, Şəmkir və Düyərli bələdiyyələri üzrə Yeni Azərbaycan Partiyasının (YAP) namizədlərinin seçicilərlə görüşü keçirilib.
Görüşdə YAP Şəmkir rayon təşkilatının sədri Fəxrəddin Vəliyev ölkəmizdə mühüm ictimai-siyasi proseslərdən və YAP-nın qazandığı uğurlardan danışıb. “Müasir Azərbaycan Heydər Əliyev şah əsəridir”, deyən Fəxrəddin Vəliyev əlavə edib ki, bu gün Ümummilli Lider Heydər Əliyevin siyasi varisi, ölkə başçısı, partiyamızın Sədri İlham Əliyevin rəhbərliyi ilə qalib xalqın nümayəndələri kimi möhtəşəm uğurlara şahidlik edir və gələcəyə doğru inamla addımlayırıq. O, həmçinin bildirib ki, YAP-ın seçkilərdə qazandığı qələbələr bu partiyanın cəmiyyətdəki yerinin möhkəmliyini, dövlətçiliyimizin gücləndirilməsi istiqamətində həyata keçirilən siyasətə xalq dəstəyini, insanların bu təşkilata yüksək etimadını göstərir.
Görüşdə seçki qərargahının üzvləri Hilal Məmmədov, Məmməd Qasımov və bələdiyyə üzvlüyünə namizədlər İlhamə İbrahimova, Samir İsgəndərov, Eldəniz Nağıyev, Əsəd Cəfərli çıxış edərək əldə olunan uğurlarla yanaşı, vətəndaş məmnunluğunun artırılması istiqamətində qarşıda mühüm vəzifələrin dayandığını da bildiriblər.
Seçicilər isə bələdiyyə seçkilərində YAP-ın namizədlərinə səs verəcəklərini bildiriblər.
