Seçki xəbərləri
“YAP-ın fəaliyyətini dəstəkləyirik”
Azərbaycan Respublikasında 2025-ci il yanvarın 29-na təyin edilmiş bələdiyyə seçkilərinin təşviqat mərhələsi çərçivəsində Ağsu rayonu, Gəgəli bələdiyyəsi üzrə Yeni Azərbaycan Partiyasının (YAP) namizədlərinin seçicilərlə görüşü keçirilib.
Görüşdə YAP Ağsu rayon təşkilatının sədri Füzuli Abdullayev bələdiyyə seçkiləri ilə bağlı YAP-ın seçki proqramı və namizədləri haqqında ətraflı məlumat verib. O qeyd edib ki, bələdiyyələr yerli özünüidarəetmə orqanları olaraq, cəmiyyətin inkişafında və vətəndaşların rifahının artırılmasında əhəmiyyətli rol oynayır. O, elə bu səbəbdən seçiciləri layiqli namizədlərə səs verməyə səsləyib.
Seçki qərargahının üzvü Vaqif Nəzərov, bələdiyyə üzvlüyünə namizədlər Səxavət Həsənov, Oqtay Temrazov çıxışlarında yeni formalaşacaq bələdiyyələrdə təmsil olunacaq YAP üzvlərinin qarşıya qoyulan hədəflərin gerçəkləşdirilməsi istiqamətində məqsədyönlü fəaliyyət göstərəcəklərini əminliklə bildiriblər.
Seçicilər adından çıxış edən Arif İsayev və Vətən müharibəsi qazisi Mehdi Cərullayev və başqaları YAP-ın fəaliyyətini dəstəklədiklərini və YAP namizədlərinə səs verəcəklərini bildiriblər.
