Seçki xəbərləri
Ağcabədi seçicilərinin seçimi bəllidir
Azərbaycan Respublikasında 2025-ci il yanvarın 29-na təyin edilmiş bələdiyyə seçkilərinin təşviqat mərhələsi çərçivəsində Ağcabədi rayonu Hüsülü bələdiyyəsi üzrə Yeni Azərbaycan Partiyasının (YAP) namizədlərinin seçicilərlə görüşü keçirilib.
YAP Ağcabədi rayon təşkilatının məsləhətçisi Nəriman Orucov yerli özünüidarəetmə orqanlarının müasir tələblərə uyğun fəaliyyətinin təmin edilməsi üçün həyata keçirilən tədbirlərdən bəhs edib. Bildirib ki, ölkədə aparılan genişmiqyaslı islahatlar bələdiyyəçilik sahəsini də əhatə edir. Bu, bələdiyyələrin fəaliyyətini daha da təkmilləşdirəcək, eyni zamanda yerli özünüidarəetmənin səmərəliliyini artıracaq.
Tədbirdə çıxış edən bələdiyyə üzvlüyünə namizədlər Səyyab Qafarov, Kəhlik Əhmədova, Arzu Həsənov, Cahid Rüstəmov və Gözəl Hüseynova vətəndaş məmnunluğunun artırılması naminə qarşıda mühüm vəzifələr dayandığı bildiriblər. Çıxış edən namizədlər bütün seçiciləri seçkilərdə fəal iştirak etməyə və layiqli namizədlərə səs verməyə çağırıblar.
Seçicilərdən Vətən Müharibəsi qazisi Rəşad Köçəriyev, Aqil Rəhimov, Qəhrəman Məmmədov, Sadıq Sadıqov, Aqil İsmayılov bələdiyyə seçkilərində partiyanın namizədlərinə səs verəcəklərini vurğulayıblar.
