Seçki xəbərləri
YAP bələdiyyə seçkilərində qələbə qazanacaq
Azərbaycan Respublikasında 2025-ci il yanvarın 29-na təyin edilmiş bələdiyyə seçkilərinin təşviqat mərhələsi çərçivəsində Neftçala rayonu Qədimkənd, Qaraqaşlı və Xol Qarabucaq bələdiyyələri üzrə Yeni Azərbaycan Partiyasının (YAP) namizədlərinin seçicilərlə görüşləri keçirilib.
Görüşlərdə çıxış edən YAP Neftçala rayon təşkilatının sədr müavini Cavad Mirzəyev bildirib ki, bələdiyyələr ərazinin sosial-iqtisadi potensialından istifadə etməklə müvafiq bölgənin inkişafını və əhalinin rifahını yüksəltmək imkanlarına malikdir. O, bələdiyyə seçkilərinin xalqımızın və demokratik hüquqi dövlət quruculuğu yolunu seçmiş müstəqil dövlətimizin həyatında mühüm əhəmiyyətə malik olduğunu deyib.
Bələdiyyə üzvlüyünə namizədlər Aydın Tarverdiyev, Elçin Eybullayev və digərləri YAP namizədlərinin təşviqat kampaniyasını uğurla apardıqlarını, partiyanın bələdiyyə seçkilərində növbəti qələbə qazanacağına əminliklərini ifadə ediblər.
Qeyd edək ki, Qaraqaşlı və Xol Qarabucaq bələdiyyələri üzrə namizədlərin seçicilərlə qapı-qapı və məhəllə görüşləri də keçirilib.
