Seçki xəbərləri
YAP-ın zəngin seçki təcrübəsi var
Azərbaycan Respublikasında 2025-ci il yanvarın 29-na təyin edilmiş bələdiyyə seçkilərinin təşviqat mərhələsi çərçivəsində Ağdaş rayonu Qolqəti bələdiyyəsi üzrə Yeni Azərbaycan Partiyasının (YAP) namizədlərinin seçicilərlə görüşü keçirilib.
Görüşdə çıxış edən YAP Ağdaş rayon təşkilatının sədr müavini İsa Eminov Yeni Azərbaycan Partiyasının zəngin seçki təcrübəsindən danışıb. Yeni Azərbaycan Partiyasının davamlı qələbələrə imza atdığını vurğulayan İsa Eminov bildirib ki, yanvarın 29-da keçiriləcək bələdiyyə seçkilərində də partiyamız parlaq qələbə qazanacaq.
Görüşdə çıxış edən bələdiyyə üzvlüyünə namizədlər Leyla Muxtarlı və Yasin Ənvərli qeyd ediblər ki, bələdiyyələrin fəaliyyəti müasir dövrün tələbləri çərçivəsində qurulmalı və vətəndaş məmnunluğunun təmin edilməsi üçün davamlı tədbirlər görülməlidir.
Çıxışlarda vurğulanıb ki, əhaliyə göstərilən xidmətlərin keyfiyyətinin yüksəldilməsi Yeni Azərbaycan Partiyasının seçki proqramında əsas hədəflər kimi öz əksini tapıb.
Görüşdə çıxış edən seçicilər Mərziyə Abbasova və Nizami Hacıyev Yeni Azərbaycan Partiyasının fəaliyyətini dəstəklədiklərini bildirərək yanvarın 29-da keçiriləcək bələdiyyə seçkilərində partiyanın namizədlərinə səs verəcəklərini bəyan ediblər.
