Seçki xəbərləri
Nərimanovda seçicilərə təşviqat materialları təqdim edilib
Azərbaycan Respublikasında 2025-ci il yanvarın 29-na təyin edilmiş bələdiyyə seçkilərinin təşviqat mərhələsi çərçivəsində Nərimanov rayonu, Nərimanov bələdiyyəsi üzrə Yeni Azərbaycan Partiyasının (YAP) namizədləri şəhid ailələlərini ziyarət edib, seçicilərlə görüşüblər.
Azərbaycan Silahlı Qüvvələrinin baş leytenantı, Vətən Müharibəsi Qəhrəmanı Azad Hümbətovun ailəsi YAP Nərimanov rayon təşkilatının rəhbərliyi və YAP-ın namizədləri tərəfindən ziyarət olunub. Ziyarət zamanı YAP Nərimanov rayon təşkilatının sədr müavini Anar Abbasov, namizədlər Təmraz Tağıyev, Nizami Babaşov və təşviqat qrupunun üzvləri bildiriblər ki, 44 günlük Vətən müharibəsində müzəffər ordumuz düşmən tapdağı altında olan bütün ərazilərimizi işğaldan azad etməklə 30 illik yurd həsrətinə son qoydu və 2020-ci il müstəqil Azərbaycanımızın tarixinə şanlı səhifə kimi yazıldı.
Vətən Müharibəsi Qəhrəmanı, şəhid Azad Hümbətovun ailəsinin üzvləri şəhid və qazi ailələrinə göstərdikləri qayğıya görə ölkə Prezidenti İlham Əliyevə və Birinci vitse-prezident Mehriban xanım Əliyevaya minnətdarlıqlarını ifadə edib.
YAP Nərimanov rayon təşkilatının gənc fəalları isə Nərimanov rayonu, A. Nemətulla, Ə. Rəcəbli və F. Yusifov küçələrində yaşayan seçicilərə təbliğat-təşviqat xarakterli materiallar təqdim edib, bukletlər paylanılıb, qarşıdan gələn seçkilərdə aktiv iştirak etməklə Yeni Azərbaycan Partiyasının namizədlərini dəstəkləməyə çağırıblar.
