Seçki-2024
YAP-ın namizədlərinə inam böyükdür
Azərbaycan Respublikasında 2025-ci il yanvarın 29-na təyin edilmiş bələdiyyə seçkilərinin təşviqat mərhələsi çərçivəsində Neftçala rayonunun Xıllı və Qaraqaşlı bələdiyyələri üzrə Yeni Azərbaycan Partiyasının (YAP) namizədlərinin seçicilərlə görüşləri keçirilib.
Xıllı bələdiyyəsi üzrə namizədlərin Boyat və Dördlər kəndlərində yaşayan seçicilərlə görüşündə çıxış edən YAP Neftçala rayon təşkilatının əməkdaşı Fərhad Baxışov bildirib ki, bələdiyyələr ərazinin sosial-iqtisadi potensialından istifadə etməklə müvafiq bölgənin inkişafını və əhalinin rifahını yüksəltmək imkanlarına malikdir. O, bələdiyyələrdə təmsil olunacaq YAP üzvlərinin yerli özünüidarəetmə orqanının fəaliyyətini müasir tələblər səviyyəsində quracaqlarına əminliyini ifadə edib.
Görüşdə bələdiyyə üzvlüyünə namizədlər Muxtar Rəsulov, Rəmziyyə Nəcəfova və Qabil Hüseynov YAP-ın Seçki Proqramından söz açıblar. Qeyd olunub ki, bələdiyyələrin birləşməsi yolu ilə yenidən təşkili bu qurumun imkanlarını və səmərəliliyini artırmağa hədəflənib.
Eyni zamanda Qaraqaşlı bələdiyyəsi üzrə namizədlər Yuxarı Qaramanlı və Qaraqaşlı kəndlərində qapı-qapı və məhəlli görüşləri də keçiriblər.
