Seçki xəbərləri
Yeni uğurlar astanasında!
Azərbaycan Respublikasında 2025-ci il yanvarın 29-na təyin edilmiş bələdiyyə seçkilərinin təşviqat mərhələsi çərçivəsində Sumqayıt şəhəri Sumqayıt bələdiyyəsi üzrə Yeni Azərbaycan Partiyasının (YAP) namizədlərinin seçicilərlə görüşü keçirilib.
Görüşü giriş sözü ilə açan YAP Sumqayıt şəhər təşkilatının sədr müavini Cavid Məmiyev YAP-ın müstəqil Azərbaycan dövlətinin inkişafına mühüm töhfələr verdiyini və bu istiqamətdə fəaliyyətini uğurla davam etdirdiyini vurğulayıb. C.Məmiyev Prezident, Yeni Azərbaycan Partiyasının Sədri İlham Əliyevin rəhbərliyi ilə həyata keçirilən siyasətin uğurlarından geniş bəhs edib.
Seçki qərargahının üzvləri Vaqif Qəhrəmanov, Sovet Şükürov, Hümbət Quliyev və bələdiyyə üzvlüyünə namizədlər Akif Kərimov, Orxan Adıgözəlzadə, Nərmin Mehdiyeva YAP-ın ümumxalq və qələbələr partiyası kimi yüksək nüfuza malik olduğunu deyiblər. Vurğulanıb ki, yanvarın 29-da keçiriləcək bələdiyyə seçkilərində də YAP-ın namizədləri inamlı qələbə qazanacaqlar.
Seçicilər Almaz Xankişiyeva, Zahid Ələkbərov seçki məntəqələrinə gedərək partiya namizədlərinə səs verəcəklərini vurğulayıblar.
Qeyd edək ki, Sumqayıt və Zeynalabdin bələdiyyələri üzrə YAP namizədlərinin seçicilərlə məhəllə görüşləri də keçirilib.
