Seçki xəbərləri
Göyçay seçicilərinin seçimi dəyişməzdir
Azərbaycan Respublikasında 2025-ci il yanvarın 29-na təyin edilmiş bələdiyyə seçkilərinin təşviqat mərhələsi çərçivəsində Göyçay rayonu Bığır bələdiyyəsi üzrə Yeni Azərbaycan Partiyasının (YAP) namizədlərinin seçicilərlə görüşü keçirilib.
Görüşdə giriş sözü ilə çıxış edən YAP Göyçay rayon təşkilatının sədri Sahib Şükürov qədirbilən Azərbaycan xalqının hər zaman Ümummilli Lider Heydər Əliyevin siyasi irsinə sadiq olduğunu deyib. Onun sözlərinə görə, Ulu Öndərin xalqımıza siyasi mirası olan YAP keçirilən bütün seçkilərdə inamlı qələbələr qazanaraq tarixi uğurlara imza atıb.
Seçki qərargahının üzvləri Namət Şirinov, Fərid Əkbərov və bələdiyyə üzvlüyünə namizədlər Rakif Hacıyev, Natavan Bilalova əldə olunan tarixi nailiyyətlərə görə seçicilərin bələdiyyə seçkilərində bir daha YAP-a etimad göstərəcəklərini diqqətə çatdırıblar.
Seçicilər Məlahət Cavadova, İkram Şükürov bələdiyyə seçkilərində də fəal iştirak edəcəklərini və YAP-ın namizədlərinə səs verəcəklərini deyiblər.
