Seçki xəbərləri
Seçkilər tarixi hadisə kimi yadda qalacaq
Azərbaycan Respublikasında 2025-ci il yanvarın 29-na təyin edilmiş bələdiyyə seçkilərinin təşviqat mərhələsi çərçivəsində Qaradağ rayonu Lökbatan, Qızıldaş bələdiyyələri üzrə Yeni Azərbaycan Partiyasının (YAP) namizədlərinin seçicilərlə görüşü keçirilib.
Görüşdə giriş sözü ilə çıxış edən YAP Qaradağ rayon təşkilatı sədrinin müavini Faiq Qurbanov bildirib ki, vətəndaşların böyük fəallıqla qatıldığı bu seçkilər ölkəmizə yeni uğurlar vəd edir. Təşkilat sədrinin müavini YAP namizədlərinin bu seçkilərdə də qalib gələcəyinə əmin olduğunu deyib.
Bələdiyyə üzvlüyünə namizədlər İdris Alışanov, Rövşən Əbdülbağıyev, Emin Ramazanlı, Rəsmiyyə Nəcəfova, Misir Mahmudov Aytən Alısoy, Azad Rzazadə və Mətləb Salmanov yerli özünüidarəetmə orqanlarının fəaliyyətinin müasir tələblər səviyyəsində qurulmasının demokratik prinsiplərin tətbiqi və vətəndaşların iştirakının artırılması baxımından son dərəcə vacib olduğunu diqqətə çatdırıblar. Qeyd olunub ki, bu məqsədlə həyata keçirilən islahatlar bələdiyyələrin şəffaflıq və hesabatlılığını artırır.
Seçicilər Mahmud Kərimov, Vüsalə Cavadova və başqaları YAP-ın siyasətini dəstəklədiklərini və bələdiyyə seçkilərində partiyanın namizədlərinə səs verəcəklərini vurğulayıblar.
Qeyd edək ki, həmin gün Qızıldaş bələdiyəsi üzrə YAP-dan olan namizədlər məhəlli görüşlər də keçiriblər.
