Seçki xəbərləri
Yerli özünüidarəetmə sahəsində islahatlar davam etdiriləcək
Azərbaycan Respublikasında 2025-ci il yanvarın 29-na təyin edilmiş bələdiyyə seçkiləri ilə əlaqədar təşviqat mərhələsi çərçivəsində Şirvan bələdiyyəsi üzrə Yeni Azərbaycan Partiyasının (YAP) namizədlərinin seçicilərlə məhəllə görüşü keçirilib.
Tofiq İsmayılov küçəsində keçirilən görüşdə çıxış edən seçki qərargahının üzvü Amil İsrayılov bələdiyyələrin fəaliyyətindən, ölkə Prezidenti, YAP-ın Sədri İlham Əliyevin rəhbərliyi ilə ölkəmizin əldə etdiyi uğurlardan, Azərbaycan xalqının sosial rifah halının daha da yaxşılaşdırılması istiqamətində yürüdülən siyasətin nəticələrindən danışıb. O, bu prosesdə bələdiyyələrin vacib rol oynadığını da deyib.
Bələdiyyə üzvlüyünə namizədlər İlham Səfərov, Emin Azadov və Telman Xəlilov da çıxışlarında bildiriblər ki, yerli özünüidarəetmə orqanlarının fəaliyyətinin müasir tələblər səviyyəsində qurulması məqsədilə islahatlar davam etdiriləcək. Bunun üçün onlar seçiciləri seçkilərdə fəal iştirak etməyə və YAP-ın namizədlərinə səs verməyə çağırıblar.
Görüşdə çıxış edən seçicilər YAP-ın fəaliyyətini dəstəklədiklərini və bələdiyyə seçkilərində bu partiyanın namizədlərinə səs verəcəklərini vurğulayıblar.
