Seçki-2024
Yeni uğurlara doğru
2024-cü il sentyabrın 1-də Azərbaycan Respublikası Milli Məclisinə keçiriləcək növbədənkənar seçkilərin təbliğat-təşviqat mərhələsi çərçivəsində Yeni Azərbaycan Partiyası (YAP) tərəfindən 114 saylı Şəki şəhər seçki dairəsindən deputatlığa namizədliyi irəli sürülmüş Vüqar İskəndərovun Baş Göynük kənd 1 saylı tam orta məktəbin akt zalında seçicilərlə görüşü keçirilib.
Əvvəlcə Azərbaycan Respublikasının Dövlət Himni səsləndirilib, Ulu Öndər Heydər Əliyevin və Azərbaycanın ərazi bütövlüyü və suverenliyi uğrunda canlarını qurban vermiş şəhidlərimizin əziz xatirəsi ehtiramla yad edilib.
Görüşü giriş sözü ilə açan YAP Şəki rayon təşkilatının sədri Daşqın Mikayılov seçkilərin əhəmiyyətindən bəhs edib, Yeni Azərbaycan Partiyasının ölkəmizə mühüm uğurlar qazandırdığını və qarşıda önəmli hədəflərin dayandığını deyib. O, partiyanın bu dəfə də möhtəşəm qələbə qazanacağına inamını ifadə edib.
Çıxış edən deputatlığa namizəd Vüqar İskəndərov qeyd edib ki, Yeni Azərbaycan Partiyasının Sədri İlham Əliyevin rəhbərliyi ilə ölkəmiz sürətlə və dinamik şəkildə inkişaf edir. Namizəd ölkəmizdə bütün sahələrdə islahatların aparıldığını, iqtisadiyyatımızın yüksək templə inkişaf etdiyini, ölkəmizin daha da qüdrətləndiyini diqqətə çatdırıb: “Azərbaycan xalqı müstəqil, suveren, bütöv Azərbaycanın vətəndaşları kimi qürurla yaşayır”.
Tədbirdə təşviqat qrupunun üzvləri Qüdrət Babayev, Sadəddin İbrahimov və digərləri çıxış edərək uğurlarımızın davamı naminə seçiciləri parlament seçkilərində YAP-ın namizədinə səs verməyə çağırıblar.
Öz növbəsində çıxış edən seçicilər - Sahib Davudov və Rəsul Əhmədov 1 sentyabrda Milli Məclisə keçiriləcək növbədənkənar seçkilərdə YAP namizədinə səs verəcəklərini ifadə ediblər.
Tədbirin sonunda Yeni Azərbaycan Partiyasının Himni səsləndirilib.
Qeyd edək ki, deputatlığa namizəd həmin gün Şəki şəhərinin Yuxarıbaş məhəlləsində seçicilərlə məhəlli görüşlər də keçirib.
