Seçki-2024
Yeni məqsədlərə doğru inamla
2024-cü il sentyabrın 1-də Azərbaycan Respublikası Milli Məclisinə keçiriləcək növbədənkənar seçkilərin təşviqat mərhələsi çərçivəsində Yeni Azərbaycan Partiyası (YAP) tərəfindən 50 saylı Abşeron üçüncü seçki dairəsindən deputatlığa namizədliyi irəli sürülmüş Ramid Namazovun Abşeron rayonunun Görədil kəndində və Mehdiabad qəsəbəsində seçicilərlə növbəti görüşü keçirilib.
Əvvəlcə Ulu Öndər Heydər Əliyevin və Azərbaycanın ərazi bütövlüyü və suverenliyi uğrunda canlarını qurban vermiş şəhidlərimizin əziz xatirəsi ehtiramla yad edilib.
Görüşlərdə YAP Abşeron rayon təşkilatının sədri Abbas Əliyev qeyd edib ki, Azərbaycan uğurla inkişaf edərək mühüm nailiyyətlərə imza atır: “Ölkəmizdə həyata keçirilən dövlət siyasətinin mərkəzində vətəndaşların rifahı və mənafeyi dayanır. İnsana qayğı, onun maddi və mənəvi tələbatlarının ödənilməsi üçün zəruri şərait yaradılıb və sosial ədalət prinsipi daim qorunur. Görülən işlər vətəndaşların layiqli həyat şəraitinin təmin olunması və sosial rifahının yaxşılaşmasında öz əksini tapıb”.
Deputatlığa namizəd Ramid Namazov Yeni Azərbaycan Partiyasının seçki platforması barədə məlumat verib. O qeyd edib ki, bu gün Azərbaycan dünyada sabitlik və təhlükəsizlik adası kimi tanınır: “Azərbaycanda mövcud olan həmrəylik, xalq-iqtidar birliyi milli təhlükəsizliyin əsaslarını daha da möhkəmləndirir. Ölkəmizdə bu gün müxtəlif dinlərin və xalqların nümayəndələri sülh, əmin-amanlıq şəraitində və tolerant mühitdə yaşayırlar. Respublikamızda multikulturalizmin həm dövlət siyasəti olaraq müəyyənləşdirilməsi, həm də cəmiyyətin həyat tərzi olması Azərbaycanın sabitlik adası kimi inkişaf yolunda inamlı irəliləyişini təmin edir”.
Təşviqat qrupunun üzvləri Ülvi Salmanov, Əbülfət Nuriyev, Nizami Zalov, Faiq Xosrovlu və Vüqar Səlimov yeni mərhələdə davamlı uğurlara nail olmaq üçün seçiciləri Yeni Azərbaycan Partiyasını dəstəkləməyə çağırıblar.
Seçicilər 1 sentyabr seçkilərə gələrək YAP-ın namizədi Ramid Namazova səslərini verəcəklərini ifadə ediblər.
Qeyd edək ki, Ramid Namazov Görədil, Fatmaıyı, Novxanı kəndlərində və Mehdiabad qəsəbəsində seçicilərlə fərdi görüşlər də keçirib.
