Seçki-2024
Qubada seçicilərlə növbəti görüş…
2024-cü il sentyabrın 1-də Azərbaycan Respublikası Milli Məclisinə keçiriləcək növbədənkənar seçkilərin təşviqat mərhələsi çərçivəsində Yeni Azərbaycan Partiyası (YAP) tərəfindən 59 saylı Quba seçki dairəsindən deputatlığa namizədliyi irəli sürülmüş Əlibala Məhərrəmzadənin YAP Quba rayon təşkilatının qərargahında şəhid ailələri ilə görüşü keçirilib.
Əvvəlcə Dövlət Himni səsləndirilib, Ulu Öndər Heydər Əliyevin və Azərbaycanın ərazi bütövlüyü və suverenliyi uğrunda canlarını qurban vermiş şəhidlərimizin əziz xatirəsi ehtiramla yad edilib.
Görüşdə çıxış edən YAP Quba rayon təşkilatının sədri Fidan Hüseynova vurğulayıb ki, Azərbaycanın ərazi bütövlüyü uğrunda öz canından keçmiş şəhidlərin ailələrinə, o cümlədən müharibə əlillərinə dövlət tərəfindən böyük diqqət və qayğı göstərilir. Azərbaycan Respublikasının Prezidenti İlham Əliyevin rəhbərliyi ilə həyata keçirilən siyasətin əsas istiqamətlərindən biri də məhz şəhid ailələrinin, müharibə veteranlarının sosial müdafiəsinin gücləndirilməsi, onların problemlərinin vaxtında həllinə nail olunmasıdır.
Seçicilər qarşısında çıxış edən deputatlığa namizəd Əlibala Məhərrəmzadə Müzəffər Ali Baş Komandan İlham Əliyevin rəhbərliyi, Azərbaycan Ordusunun şücaəti ilə ölkəmizin ərazi bütövlüyünün bərpa olunduğunu, adları tarixə qızıl hərflərlə yazılan şəhidlərimizin daim hörmət və ehtiramla yad edildiyini, gələcək nəsillərə örnək olduğunu qeyd edib.
Görüşdə şəhid anası Tünzalə Abduləlimova, təşviqat qrupunun üzvü Yusif Nöhbalayev çıxış edərək şəhid ailələri, qazilərin ölkənin hər yerində olduğu kimi, Quba rayonunda da hər zaman diqqət və qayğı ilə əhatə olunduqlarını deyiblər.
