Seçki-2024
YAP xalqın partiyasıdır
Azərbaycan Respublikası Milli Məclisinə 2024-cü il sentyabrın 1-də keçiriləcək növbədənkənar seçkilərin təşviqat mərhələsi çərçivəsində Yeni Azərbaycan Partiyası (YAP) tərəfindən 43 saylı Sumqayıt ikinci seçki dairəsindən deputatlığa namizədliyi irəli sürülmüş Tahir Mirkişili YAP Sumqayıt şəhər təşkilatının qərargahında şəhid ailələri, qazilər və müharibə veteranları ilə görüş keçirib.
Əvvəlcə Ulu Öndər Heydər Əliyevin və Azərbaycanın ərazi bütövlüyü və suverenliyi uğrunda canlarından keçmiş şəhidlərimizin xatirəsi ehtiramla yad edilib.
Görüşü giriş sözü ilə açan YAP Sumqayıt şəhər təşkilatının sədri Ramiz Hüseynov Prezident İlham Əliyevin uğurlu siyasəti haqqında danışaraq dövlətin şəhid ailələri, qazilər və müharibə veteranlarına göstərdiyi diqqət və qayğıdan bəhs edib. R.Hüseynov Prezident İlham Əliyevin rəhbərliyi ilə Azərbaycanın əldə etdiyi uğurların, xüsusilə şəhid ailələrinə göstərilən dəstəyin əhəmiyyətini vurğulayıb. Həmçinin, Heydər Əliyev siyasətinin Azərbaycan xalqının rifahı üçün qoyduğu möhkəm təməlin qorunub saxlanmasının vacibliyini qeyd edib.
Sonra Tahir Mirkişilinin fəaliyyəti və gördüyü işləri əks etdirən hesabat xarakterli videoçarx nümayiş etdirilib. Çıxış edən Tahir Mirkişili iştirakçılara göstərdikləri dəstək və etimad üçün təşəkkür edərək yenidən deputat seçiləcəyi təqdirdə onların hüquqlarının qorunması və rifahlarının yaxşılaşdırılması üçün var gücü ilə çalışacağını bildirib.
Tədbirdə çıxış edən təşviqat qrupunun üzvləri Nizami Əliyev, Nəzakət İsmayılova ölkəmizdə keçiriləcək seçkilərin əhəmiyyətindən bəhs ediblər. Onlar seçiciləri parlament seçkilərində YAP-ın namizədinə səs verməyə çağırıblar.
Görüş zamanı şəhid ailələri, qazilər və müharibə veteranları, öz sual və təkliflərini görüş iştirakçılarına çatdırıblar.
Qeyd edək ki, deputatlığa namizəd Tahir Mirkişili YAP Sumqayıt şəhər təşkilatının qərargahında daha bir görüş keçirib.
