Seçki-2024
Yüksək inkişaf və uğurlu gələcək naminə
2024-cü il sentyabrın 1-də Azərbaycan Respublikası Milli Məclisinə keçiriləcək növbədənkənar seçkilərin təbliğat-təşviqat mərhələsi çərçivəsində Yeni Azərbaycan Partiyası (YAP) tərəfindən 66 saylı Saatlı seçki dairəsindən deputatlığa namizədliyi irəli sürülmüş Əziz Ələkbərlinin YAP Saatlı rayon təşkilatının qərargahında gənclərlə, eləcə də ilk dəfə səs verəcək seçicilərlə görüşü keçirilib.
Əvvəlcə Ulu Öndər Heydər Əliyevin və Vətən uğrunda canlarını qurban vermiş şəhidlərimizin əziz xatirəsi bir dəqiqəlik sükutla yad edilib.
Görüşləri giriş sözü ilə açan YAP Saatlı rayon təşkilatının sədri Elşən Əzizov Yeni Azərbaycan Partiyasının parlament seçkilərinə “Yeni dövrə yeni Azərbaycanla!” şüarı ilə qatıldığını diqqətə çatdıraraq bildirib ki, Azərbaycanın yeni dövrə uğurlu transformasiyası və qarşıdakı yeni prioritetlərə uyğun tempdə inkişafın təmini üçün yeni parlament seçkiləri də tarixi zərurətdir.
Çıxış edən deputatlığa namizəd Əziz Ələkbərli bildirib ki, Azərbaycanın bütün ərazilərində keçirilən ilk seçkilər prezident seçkiləri oldu. İndi də 1 sentyabrda xalqımız ilk dəfə olaraq işğaldan azad olunmuş ərazilərdə parlament seçkilərində iştirak edəcək.
Tədbirdə, həmçinin təşviqat qrupunun üzvləri Bəylər Əliyev, Lətif Şimşəkov və digərləri çıxış ediblər. Qeyd olunub ki, Azərbaycan möhkəm təməl üzərində çox yüksək səviyyədə davamlı uğurlara imza atır. Bu reallığı da xüsusi qeyd etməliyik ki, ölkəmiz iqtisadi, siyasi və humanitar mərkəz kimi daim dünyanın diqqətindədir.
Çıxış edənlər uğurlarımızın davamı naminə seçiciləri bu seçkilərdə də Yeni Azərbaycan Partiyasının namizədinə səs verməyə çağırıblar.
Çıxış edən seçicilər də 1 sentyabr seçkilərində ən layiqli namizəd olan Yeni Azərbaycan Partiyasının namizədinə səs verəcəklərini vurğulayıblar.
Qeyd edək ki, həmin gün deputatlığa namizəd Əziz Ələkbərli Saatlı şəhər ərazisində də seçicilərlə görüşüb.
