YENİ AZƏRBAYCAN PARTİYASI

2024-cü il sentyabrın 1-də Azərbaycan Respublikası Milli Məclisinə keçiriləcək növbədənkənar seçkilərin təbliğat-təşviqat mərhələsi çərçivəsində Yeni Azərbaycan Partiyası (YAP) tərəfindən 86 saylı Ağcabədi seçki dairəsindən deputatlığa namizədliyi irəli sürülmüş Tahir Rzayevin rayonun Salmanbəyli, Avşar, Muğanlı və Şahsevən Təzəkənd  kəndlərinin seçiciləri ilə görüşlər keçirib.

Əvvəlcə Azərbaycan Respublikasının Dövlət Himni səsləndirilib. Ulu Öndər Heydər Əliyevin və Azərbaycanın ərazi bütövlüyü və suverenliyi uğrunda canlarını qurban vermiş şəhidlərimizin əziz xatirəsi ehtiramla yad edilib.

Görüşləri YAP Ağcabədi rayon təşkilatının sədri Rövşən Əhmədov açaraq bildirib ki, Yeni Azərbaycan Partiyası yarandığı vaxtdan ölkəmizin milli maraqlarının qorunmasında mühüm rol oynayıb, dövlət müstəqilliyinin möhkəmləndirilməsi, demokratik, hüquqi, dünyəvi dövlətin qurulması, vətəndaşların dinc və firəvan həyatının təmin edilməsi istiqamətində ardıcıl fəaliyyət nümayiş etdirir.

Deputatlığa namizəd Tahir Rzayev çıxış edərək YAP-ın seçki platforması barədə məlumat verib. O, çıxışında Ümummilli Lider Heydər Əliyev tərəfindən əsası qoyulan və bu gün Prezident İlham Əliyevin davam etdirdiyi siyasi kursun Azərbaycana cox böyük uğurlar qazandırdığını real faktlarla seçicilərin diqqətinə çatdırıb. Namizəd növbəti dəfə deputat seçiləcəyi təqdirdə, görəcəyi işlər barədə məlumat verib.

Görüşlərdə seçicilər adından çıxış edən Salmanbəyli kənd sakinləri Heydar Məmmədov, Xədicə Əliyeva, Mərziyyə Musayeva, Avşar kənd sakinləri Əbülfət Tapdıqov, Yasin Cəfərov, Ədalət Hüseynov, Günay Camalxanova, Zahid Eloğlu və Vəsilə Hüseynzadə sentyabrın 1-də seçki məntəqələrinə gedərək hamılıqla Yeni Azərbaycan Partiyasının namizədini dəstəkləyəcəklərini bildiriblər.

Görüşlər Yeni Azərbaycan Partiyasının Himninin səslənməsi ilə başa çatıb.

Qeyd edək ki, Tahir Rzayev seçicilərlə fərdi görüşlər də keçirib. O, Ağcabədi şəhərində Vətən müharibəsi şəhidi Həsən Süleymanovun doğum günündə şəhidin ailəsini ziyarət edib.