Seçki-2024
Yeni hədəflərin gerçəkləşdirilməsi əsas məqsədlərdəndir
2024-cü il sentyabrın 1-də Azərbaycan Respublikası Milli Məclisinə keçiriləcək növbədənkənar seçkilərin təbliğat-təşviqat mərhələsi çərçivəsində Yeni Azərbaycan Partiyası (YAP) tərəfindən 34 saylı Xətai ikinci seçki dairəsindən deputatlığa namizədliyi irəli sürülmüş Mixail Zabelinin seçicilərlə növbəti görüşü keçirilib.
Görüşü giriş sözü ilə açan YAP Xətai rayon təşkilatının sədr müavini Vüqar Hüseynov yeni dövrə qədəm qoyan yeni Azərbaycanın hədəflərindən bəhs edib. Bildirib ki, bu hədəflərin gerçəkləşdirilməsi Azərbaycanı daha möhtəşəm uğurlara, Zəfərlərə qovuşduracaq. 44 günlük İkinci Qarabağ müharibəsində tarixi Zəfərimizdən sonra Azərbaycanın qazandığı uğurların xronologiyasına diqqət yetirmək kifayətdir. Yeni Azərbaycan Partiyasının seçki platformasında bu hədəflər öz əksini tapıb.
Deputatlığa namizəd Mixail Zabelin qeyd edib ki, bu gün harada yaşamasından asılı olmayaraq bütün azərbaycanlılar qalib, bütövləşən Azərbaycanın zəfərləri ilə qürur duyur. Bu zəfərlərə yol açan dahi şəxsiyyət Ulu Öndər Heydər Əliyevin düşünülmüş siyasətinin yaratdığı möhkəm təməldir. Prezident İlham Əliyev böyük qürur hissi ilə ata vəsiyyətini yerinə yetirdiyini bildirdi. Hazırda işğaldan azad edilmiş ərazilərdə seçki əhval-ruhiyyəsi mövcuddur.
Mixail Zabelin seçiciləri fəal olmağa, YAP-ın namizədlərinə səs verməyə çağırıb.
Tədbirdə YAP Xətai rayon təşkilatı üzrə Təşviqat Qrupunun üzvləri- Mürvət Əsgərov və şəhid atası Meyvəddin Ramaldanov, namizədin vəkili Firdovsi Cahangirov, rayon ağsaqqalı Nizami Hüseynov çıxış edərək seçiciləri parlament seçkilərində YAP-ın namizədinə səs verməyə çağırıblar.
