Seçki-2024
Salyanlı gənclər YAP-ın namizədinə səs verəcəklər
2024-cü il sentyabrın 1-də Azərbaycan Respublikası Milli Məclisinə keçiriləcək növbədənkənar seçkilərin təbliğat-təşviqat mərhələsi çərçivəsində Yeni Azərbaycan Partiyası (YAP) tərəfindən 64 saylı Salyan seçki dairəsindən deputatlığa namizədliyi irəli sürülmüş Sadiq Qurbanovun rayonun Qarabağlı kəndində gənc seçicilərlə görüşü keçirilib.
Əvvəlcə Ulu Öndər Heydər Əliyevin və Azərbaycanın ərazi bütövlüyü və suverenliyi uğrunda canlarını qurban vermiş şəhidlərimizin əziz xatirəsi ehtiramla yad edilib.
Görüşü giriş sözü ilə açan YAP Salyan rayon təşkilatının sədri Elmar Əhmədov YAP sıralarında gənclərin böyük üstünlük təşkil etdiyini və partiyaya yeni üzv olanların mütləq əksəriyyətinin də gənclərdən ibarət olduğunu diqqətə çatdırıb. Onun sözlərinə görə, bu gün əsası Ulu Öndər Heydər Əliyev tərəfindən qoyulan, Prezident İlham Əliyevin rəhbərliyi ilə davam etdirilən uğurlu gənclər siyasətinin nəticəsidir ki, ölkəmizdə layiqli gənclik yetişir. Təşkilat sədri bildirib ki, gənclər dövlətin onlar üçün yaratdığı imkanlardan səmərəli istifadə etməlidirlər.
Daha sonra çıxış edən deputatlığa namizəd Sadiq Qurbanov Azərbaycanda dövlət gənclər siyasətinin formalaşmasının Ümummilli Lider Heydər Əliyevin adı ilə sıx bağlı olduğunu deyib. Namizəd Ulu Öndərin respublikamıza rəhbərliyinin bütün dövrlərində sağlam gəncliyin, bu dövlətə sahib çıxa biləcək, onu inkişaf etdirəcək nəslin yetişməsinə çalışdığını, bu siyasətin Prezident İlham Əliyevin rəhbərliyi ilə davam etdirildiyini diqqətə çatdırıb. S.Qurbanov Azərbaycanın hərtərəfli inkişafında gənclərin rolunun danılmaz olduğunu vurğulayıb.
Tədbirdə çıxış edən gənc seçicilər 1 sentyabr - parlament seçkilərində fəal iştirak edəcəklərini və YAP-ın namizədinə səs verəcəklərini diqqətə çatdırıblar.
Qeyd edək ki, həmin gün deputatlığa namizəd Sadiq Qurbanov rayonun Kərimbəyli, Qarabağlı, Təzəkənd və Kolanı kəndlərində seçicilərlə fərdi görüşlər də keçirib, Kərimbəyli kəndində şəhid Sadiq Qəhrəmanovun, Qarabağlı kəndində isə şəhid Elmar Daşdəmirovun ailələri ziyarət olunub.
