Seçki-2024
YAP-ın ölkəmizin ictimai-siyasi həyatında özünəməxsus yeri var
2024-cü il sentyabrın 1-də Azərbaycan Respublikası Milli Məclisinə keçiriləcək növbədənkənar seçkilərin təşviqat mərhələsi çərçivəsində Yeni Azərbaycan Partiyası (YAP) tərəfindən 39 saylı Gəncə ikinci seçki dairəsindən deputatlığa namizədliyi irəli sürülmüş Pərvin Kərimzadənin YAP Gəncə şəhər təşkilatının qərargahında seçicilərlə görüşü keçirilib.
Əvvəlcə Ulu Öndər Heydər Əliyevin, Azərbaycanın ərazi bütövlüyü və suverenliyi uğrunda canlarını qurban vermiş şəhidlərin əziz xatirəsi ehtiramla yad edilib.
YAP Gəncə şəhər təşkilatının sədri Bayram Aslanov bildirib ki, Ulu Öndər Heydər Əliyevin layiqli varisi - Prezident İlham Əliyevin rəhbərliyi ilə Azərbaycan uğurla inkişaf edərək bölgənin aparıcı və ən qüdrətli dövlətinə çevrilib.
Deputatlığa namizəd Pərvin Kərimzadə Yeni Azərbaycan Partiyasının parlament seçkilərinə “Yeni dövrə Yeni Azərbaycanla!” şüarı ilə qatıldığını bildirib. O, Ümummili Lider Heydər Əliyevin qurucusu olduğu Yeni Azərbaycan Partiyasının ölkəmizin ictimai-siyasi həyatında özünəməxsus yeri olduğunu deyib: “YAP uğurla fəaliyyət göstərir və Prezident İlham Əliyevin rəhbərliyi ilə müvəffəqiyyətlərə imza atır”.
Görüş iştirakçıları Elçin Axundov, Ramil Qasımov, Kənan Qurbanov və digərləri çıxış edərək seçiciləri ölkəmizin parlaq gələcəyi naminə YAP-ın namizədinə səs verməyə çağırıblar.
Qeyd edək ki, deputatlığa namizəd Pərvin Kərimzadə seçicilərlə fərdi görüşlər də keçirib.
