Seçki-2024
Gənclərin seçimi YAP-ın namizədidir
2024-cü il sentyabrın 1-də Azərbaycan Respublikası Milli Məclisinə keçiriləcək növbədənkənar seçkilərin təbliğat-təşviqat mərhələsi çərçivəsində Yeni Azərbaycan Partiyası (YAP) tərəfindən 82 saylı İmişli-Saatlı seçki dairəsindən deputatlığa namizədliyi irəli sürülmüş Səyyad Salahlının İmişli rayonunda gənclər və idmançılarla görüşü keçirilib.
Görüşü giriş sözü ilə açan YAP İmişli rayon təşkilatının sədri Səfa Ağayev bildirib ki, gəncləri Azərbaycanın bu günü, sabahı və ümidi adlandıran Ulu Öndər Heydər Əliyev hər zaman milli-mənəvi dəyərlərə sadiq, vətənpərvər, sağlam gəncliyin yetişməsinə xüsusi diqqət yetirib, bu istiqamətdə ardıcıl və məqsədyönlü siyasət həyata keçirib: “Bu gün gənc nəslin xalqımıza məxsus zəngin milli-mənəvi dəyərlər əsasında – yüksək vətənpərvərlik ruhunda yetişdirilməsi istiqamətində uğurlu dövlət siyasəti həyata keçirilir”.
Deputatlığa namizəd Səyyad Salahlı çıxışında əvvəlcə YAP-ın seçki platforması haqqında ətraflı danışıb. Qeyd edib ki, Ümummilli Lider Heydər Əliyev müasir Azərbaycanın və YAP-ın yaradıcısı kimi xalqımızın qəlbində silinməz izlər buraxıb: “Dahi lider Heydər Əliyevin xüsusilə Azərbaycan gənclərinə göstərdiyi diqqət və qayğı bugünkü gəncliyin saysız-hesabsız uğurlarını təmin edib. Prezident İlham Əliyevin və birinci xanım Mehriban Əliyevanın düzgün və məqsədyönlü fəaliyyəti nəticəsində Azərbaycan gəncləri beynəlxalq arenada dövlət bayrağımızı qürurla dalğalandırır. Azərbaycan qüdrətli, sarsılmaz və böyük nüfuz sahibi olan dövlət kimi dünyada tanınır və böyük uğurlara imza atır”.
Tədbirdə, həmçinin 1-ci Qarabağ müharibəsi qazisi Vüqar Muradov, Aqşin Mürsəlov, Ziya Paşayev və digərləri çıxış ediblər.
Çıxış edənlər uğurlarımızın davamı naminə seçiciləri parlament seçkilərində YAP-ın namizədinə səs verməyə çağırıblar.
Qeyd edək ki, deputatlığa namizəd rayonun Sarıxanlı kəndində fərdi görüşlər də keçirib.
