Seçki-2024
Məqsədə doğru
2024-cü il sentyabrın 1-də Azərbaycan Respublikası Milli Məclisinə keçiriləcək növbədənkənar seçkilərin təşviqat mərhələsi çərçivəsində Yeni Azərbaycan Partiyası (YAP) tərəfindən 98 saylı Bərdə-Tərtər seçki dairəsindən deputatlığa namizədliyi irəli sürülmüş Xanlar Fətiyevin Bərdə rayonu, Əmirli və Kətəlparaq kəndlərində seçicilərlə görüşü keçirilib.
Görüşlərdə əvvəlcə Azərbaycan Respublikasının Dövlət himni səsləndirilib, Ulu Öndər Heydər Əliyevin və Azərbaycanın ərazi bütövlüyü və suverenliyi uğrunda canlarını qurban vermiş şəhidlərimizin əziz xatirəsi ehtiramla yad edilib.
Görüşləri giriş sözü ilə açan YAP Bərdə rayon təşkilatının sədri Faqət Şadlinskaya bildirib ki, Yeni Azərbaycan Partiyası bu seçkilərə mövcud uğurların fonunda gələcək hədəfləri reallaşdırmaq naminə qələbə əzmi ilə qatılır. O, bütün seçiciləri birlikdə növbəti zəfərlərə doğru inamla addımlamağa çağırırıb.
Çıxış edən deputatlığa namizəd Xanlar Fətiyev bildirib ki, Yeni Azərbaycan Partiyası qarşıda duran bütün hədəfləri reallaşdıraraq Prezident İlham Əliyevin rəhbərliyi ilə yeni Azərbaycanı yalnız qələbələrlə irəli aparacaq: “Bununla da YAP cənab İlham Əliyevin məqsədyönlü və uzaqgörən siyasətinin həyata keçirilməsinə öz töhfələrini verəcək”.
Görüşlərdə təşviqat qrupunun üzvü Məhərrəm Şəfiyev, şəhid anaları Mehparə Qəribova və İsbət Hətəmova çıxış ediblər.
Seçicilər İlham İbrahimov, Məhəmməd Tənfəyev, Vaqif Abışov, Gülşən Qəhrəmanov, Rasim Hüseynov, Zərniyar Quliyeva və digərləri dövlətə və dövlətçiliyə sədaqətlərini Yeni Azərbaycan Partiyasının namizədlərinə səs verməklə nümayiş etdirəcəklərini bildiriblər.
Görüşlər Yeni Azərbaycan Partiyasının himninin səsləndirilməsi ilə başa çatıb.
Qeyd edək ki, həmin gün deputatlığa namizəd Xanlar Fətiyev rayonun Əmirli kənd şəhidlərinin məzarlarını ziyarət edib, şəhid bulaq-kompleksi önünə gül dəstələri düzüb, həmçinin Kətəlparaq kənd sakini Alırza Alırzayevin ev ziyarətində olub, seçiciləri ilə görüşüb.
