Seçki-2024
Yevlax gəncləri YAP-ın namizədinə səs verəcək
2024-cü il sentyabrın 1-də Azərbaycan Respublikası Milli Məclisinə keçiriləcək növbədənkənar seçkilərin təşviqat mərhələsi çərçivəsində Yeni Azərbaycan Partiyası (YAP) tərəfindən 53 saylı Yevlax-Mingəçevir seçki dairəsindən deputatlığa namizədliyi irəli sürülmüş Əli Hüseynlinin YAP Yevlax rayon təşkilatının qərargahında gənc seçicilərlə görüşü keçirilib.
Görüşdə çıxış edən YAP Yevlax rayon təşkilatının sədri Rafiq Əliyev bildirib ki, Prezident İlham Əliyevin rəhbərliyi ilə əldə etdiyimiz böyük nailiyyətlər Azərbaycanı firavan gələcəyə doğru aparır: “Bu, bir daha onu göstərir ki, Ulu Öndər Heydər Əliyevin müdrik ideyaları daim yaşayır. YAP-ı dəstəkləmək məhz Prezident İlham Əliyevin “Dəmir yumruq” u ətrafında sıx birləşməkdir”.
Deputatlığa namizəd Əli Hüseynli çıxışında əvvəlcə YAP-ın seçki platforması haqqında ətraflı danışıb. Qeyd edilib ki, Ümummilli Lider Heydər Əliyev müasir Azərbaycanın və YAP-ın yaradıcısı kimi xalqımızın qəlbində silinməz izlər buraxıb: “Dahi Lider Heydər Əliyevin xüsusilə Azərbaycan gənclərinə göstərdiyi diqqət və qayğı bugünkü gəncliyin saysız-hesabsız uğurlarını təmin edib. Prezident İlham Əliyevin və birinci xanım Mehriban Əliyevanın düzgün və məqsədyönlü fəaliyyəti nəticəsində Azərbaycan gəncləri beynəlxalq arenalarda dövlət bayrağımızı qürurla dalğalandırır. Azərbaycan qüdrətli, sarsılmaz və böyük nüfuz sahibi olan dövlət kimi dünyada tanınır və böyük uğurlara imza atır”.
Ə.Hüseynli müasir Azərbaycanın daha böyük uğurları təmin etməsi üçün seçiciləri parlament seçkilərində fəal olmağa, YAP-ın namizədinə səs verməyə çağırıb.
Çıxış edən seçicilər vurğulayıblar ki, yeni dövrə yeni Azərbaycanla birgə addımlamaq üçün seçkilərdə fəal olacaq və YAP-ın namizədlərinə səs verəcəklər.
Qeyd edək, Ə.Hüseynli həmin gün Yevlax rayonu, Nərimanabad kəndində yaşayan seçicilərlə də görüş keçirib. Deputatlığa namizəd, həmçinin, rayonun Aran qəsəbəsi və Nemətabad kəndlərində yaşayan şəhid ailələrini də ziyarət edib.
