Seçki-2024
“Zəfər yolunda birgə addımlayacağıq!”
2024-cü il sentyabrın 1-də Azərbaycan Respublikası Milli Məclisinə keçiriləcək növbədənkənar seçkilərin təşviqat mərhələsi çərçivəsində Yeni Azərbaycan Partiyası (YAP) tərəfindən 100 saylı Göygöl-Daşkəsən-Kəlbəcər seçki dairəsindən deputatlığa namizədliyi irəli sürülmüş Kamran Bayramovun Göygöl şəhərində gənclərlə görüşü keçirilib.
YAP Göygöl rayon təşkilatının qərargahında keçirilən görüşdə əvvəlcə Ulu Öndər Heydər Əliyevin və Azərbaycanın ərazi bütövlüyü və suverenliyi uğrunda canlarını qurban vermiş şəhidlərimizin əziz xatirəsi ehtiramla yad edilib.
Görüşdə giriş sözü ilə çıxış edən YAP Göygöl rayon təşkilatının sədri Vüqar İsayev gənclər siyasətinin Azərbaycanda dövlət siyasətinin mühüm prioritetlərindən biri olduğunu diqqətə çatdırıb. O bildirib ki, Azərbaycan Respublikasının Prezidenti İlham Əliyev gəncliyin inkişafına xüsusi diqqət göstərməklə Azərbaycanın daha xoşbəxt gələcəyini təmin edir. Bu siyasət mütərəqqi düşüncəli, intellektual, sağlam əqidəli və zəngin mənəviyyatlı Azərbaycan gəncliyinin formalaşmasına və inkişafına hədəflənmişdir. O, Azərbaycan gənclərinin Heydər Əliyev ideyalarına sadiq olduqlarını vurğulayıb.
Deputatlığa namizəd Kamran Bayramov əvvəlcə Yeni Azərbaycan Partiyasının parlament seçkilərinə “Yeni dövrə Yeni Azərbaycanla!” şüarı ilə qatıldığını vurğulayaraq YAP-ın seçki platforması barədə məlumat verib. Azərbaycanda gənclər siyasətinin mahiyyət və keyfiyyətcə yeni mərhələyə qədəm qoyduğunu söyləyən namizəd gənclərin cəmiyyətin müxtəlif sahələrində, o cümlədən ictimai-siyasi həyatda rolunun artırılması istiqamətində görülən işlərdən danışıb: “Yeni Azərbaycan Partiyası da öz fəaliyyətində gənclərin potensialından səmərəli istifadə olunmasına xüsusi diqqət yetirir”.
Görüşdə çıxış edən Dilarə Mövlayeva, seçicilərdən Aslan Həsənov, Nazilə Mirzəliyeva və digərləri daha qüdrətli Azərbaycan naminə YAP-ın namizədinə səs verəcəklərini ifadə ediblər. “Zəfər yolunda birgə addımlayacağıq!”, - deyə vurğulanıb.
Qeyd edək ki, K.Bayramov Göygöl rayonunun Hacıməlik qəsəbəsində, Çaylı, Pənahlılar və Dozular kəndlərində də seçicilərlə görüşüb.
