Seçki-2024
Qaradağda şəhid ailələri və qazilərlə görüş keçirilib
2024-cü il sentyabrın 1-də Azərbaycan Respublikası Milli Məclisinə keçiriləcək növbədənkənar seçkilərin təbliğat-təşviqat mərhələsi çərçivəsində Yeni Azərbaycan Partiyası (YAP) tərəfindən 37 saylı Qaradağ seçki dairəsindən deputatlığa namizədliyi irəli sürülmüş Aydın Hüseynov rayonun bir neçə qəsəbəsində şəhid ailələrini və qaziləri ziyarət edib.
Əvvəlcə Ulu Öndər Heydər Əliyevin və Azərbaycanın ərazi bütövlüyü və suverenliyi uğrunda canlarını qurban vermiş şəhidlərimizin əziz xatirəsi ehtiramla yad edilib.
Təbliğat və təşviqat görüşləri çərçivəsində Qaradağ rayonu Qobustan qəsəbəsi şəhid Pünhan Nəsir oğlu Abbasovun doğum günü münasibətilə ailəsi ziyarət olunub. Sonra Korgöz qəsəbəsində şəhid Ağabəy Zaur oğlu Məmmədquliyevin məzarı ziyarət olunub, ailəsinə baş çəkilib.
Şəhid ailələrini ziyarət etdikdən sonra deputatlığa namizəd Aydın Hüseynov Səngəçal qəsəbəsində yaşayan Vətən müharibəsi qazisi, birinci dərəcəli əlil Saməddin Həmid oğlu Əhmədovu evində ziyarət edərək onun qayğı və problemləri ilə maraqlanıb.
Ziyarət olunan şəhidlərin ailə üzvləri və 44 günlük Vətən müharibəsi qazisi Saməddin Əhmədov şəhid ailələri və qazilərə dövlət səviyyəsində göstərilən diqqət və qayğıya görə Prezident İlham Əliyevə və birinci vitse-prezident Mehriban xanım Əliyevaya minnətdarlıqlarını bildirərək yeni zəfərlər naminə sentyabrın 1-də keçiriləcək seçkilərdə YAP-ın namizədinə səs verəcəklərini bildiriblər.
