YENİ AZƏRBAYCAN PARTİYASI

2024-cü il sentyabrın 1-də Azərbaycan Respublikası Milli Məclisinə keçiriləcək növbədənkənar seçkilərin təşviqat kampaniyası çərçivəsində Yeni Azərbaycan Partiyası (YAP) tərəfindən 59 saylı Quba seçki dairəsindən deputatlığa namizədliyi irəli sürülmüş Əlibala Məhərrəmzadənin Quba rayonunun Vəlvələ və Qorxmazoba kəndlərindən olan seçicilərlə görüşü keçirilib.

Görüşdə çıxış edən YAP Quba rayon təşkilatının sədri Fidan Hüseynova bildirib ki, ötən dövr ərzində YAP sübut edib ki, ümumxalq dəstəyi və etimadı qazanan qələbələr partiyasıdır: “Əminik ki, parlament seçkilərində də xalqımız YAP-ın namizədlərini dəstəkləyəcək və partiyamız bu seçkilərdə də növbəti möhtəşəm uğurunu qazanacaq”. F.Hüseynova Əlibala Məhərrəmzadənin layiqli namizəd olduğunu bildirərək seçiciləri ona səs verməyə çağırıb.

Görüşlərdə çıxış edən deputatlığa namizəd Əlibala Məhərrəmzadə YAP tərəfindən 59 saylı Quba seçki dairəsindən namizədliyinin irəli sürülməsinə görə partiyanın Sədri, Prezident İlham Əliyevə dərin minnətdarlığını bildirib.  O, YAP tərəfindən ona böyük etimad göstərildiyini və qubalı seçicilərlə birlikdə bu etimadı doğrultmağa çalışacağını qeyd edib.

Görüşlərdə çıxış edən seçki qərargahının  üzvləri Laçın Səfərəliyev və Elza Orucova YAP namizədi Əlibala Məhərrəmzadənin parlament seçkilərində qalib gələcəyinə əminliklərini ifadə ediblər.

Çıxış edən seçicilər də bildiriblər ki, Prezident İlham Əliyevin Sədri olduğu, seçkilərə “Yeni dövrə Yeni Azərbaycanla” şüarı ilə gedən partiyanın namizədi Ə.Məhərrəmzadəyə səs verəcəklər.

Qeyd edək ki, həmin gün deputatlığa namizəd Ə.Məhərrəmzadə YAP Quba rayon təşkilatının sədri F.Hüseynova ilə birlikdə Azərbaycanın ərazi bütövlüyü uğrunda canından keçən şəhidlər Əskər Əhmədkişi oğlu Əhmədovun, Səlim Sultan oğlu Sultanovun, Ümid İlqar oğlu Həsənovun və Nurdəddin Nüsrəttin oğlu Rzayevin ailələrini ziyarət ediblər.

Şəhidlərin xatirəsinə ucaldılan Abidə kompleksinin önünə gül dəstələri qoyulub, Vətənin qəhrəman övladlarının xatirəsi ehtiramla yad edilib.