Seçki-2024
Seçkilər tarixi hadisə kimi yadda qalacaq
Azərbaycan Respublikası Milli Məclisinə keçiriləcək növbədənkənar seçkilərin təşviqat mərhələsi çərçivəsində Yeni Azərbaycan Partiyası tərəfindən 66 saylı seçki dairəsi üzrə deputatlığa namizədliyi irəli sürülmüş Əziz Ələkbərlinin YAP Saatlı rayon təşkilatının qərargahında ziyalılar və ağsaqqallar, şəhid ailələrinin üzvləri, müharibə veteranları və iştirakçıları ilə görüşü keçirilib.
Əvvəlcə Ulu Öndər Heydər Əliyevin və Vətən uğrunda canlarını qurban vermiş şəhidlərimizin əziz xatirəsi bir dəqiqəlik sükutla yad edilib.
Görüşü giriş sözü ilə açan YAP Saatlı rayon təşkilatının sədri Elşən Əzizov parlament seçkilərinə “Yeni dövrə yeni Azərbaycanla!” şüarı ilə qatılan Yeni Azərbaycan Partiyasının seçki platforması haqqında ətraflı məlumat verib.
Çıxış edən deputatlığa namizəd Əziz Ələkbərli bildirib ki, seçkilərin bütün ərazilərimizdə keçirilməsi hər bir azərbaycanlı üçün böyük fəxrdir. Müstəqillik tariximizdə ilk dəfə olaraq Milli Məclisə seçkilər bütün ölkə ərazisində keçiriləcək. O, seçiciləri belə bir tarixi hadisədə iştirak etməyə çağırıb.
Tədbirdə, həmçinin təşviqat qrupunun üzvləri Lütvəli Şıxəliyev, Lətif Şimşəkov, Sədafər Hüseynov, Əliağa Qurbanov, Vüsalə Tağıyeva, Ürvət Ağayeva və digərləri çıxış ediblər. Çıxış edənlər uğurlarımızın davamı naminə seçiciləri bu seçkilərdə də Yeni Azərbaycan Partiyasının namizədinə səs verməyə çağırıblar. Seçicilər də 1 sentyabr seçkilərində ən layiqli namizəd olan Yeni Azərbaycan Partiyasının namizədinə səs verəcəklərini vurğulayıblar.
