Seçki-2024
Ucarlıların seçimi YAP-ın namizədidir
2024-cü il sentyabrın 1-də Azərbaycan Respublikası Milli Məclisinə keçiriləcək növbədənkənar seçkilərin təbliğat-təşviqat mərhələsi çərçivəsində Yeni Azərbaycan Partiyası (YAP) tərəfindən 94 saylı Ucar seçki dairəsindən deputatlığa namizədliyi irəli sürülmüş Ramil Həsənin rayonun Qazyan və Yuxarı Şilyan kəndlərində seçicilərlə görüşləri keçirib.
Görüşü açıq elan edən YAP Ucar rayon təşkilatının sədri Şəhla bildirib ki, 1993-cü ildən bəri ölkəmizdə keçirilən bütün seçkilərin qalibi məhz YAP olub: “Partiyanın hər bir seçkidə böyük üstünlüklə qalib gəlməsi onun cəmiyyətdəki möhkəm yerini və dövlətçiliyimizin inkişafına verdiyi töhfələrin xalq tərəfindən dəstəkləndiyini bir daha sübut edir”.
Deputatlığa namizədi Ramil Həsən “Yeni dövrə Yeni Azərbaycanla!” şüarı ilə YAP Sədri, Prezident İlham Əliyevin rəhbərliyi altında cəsarətlə irəlilədiklərini və suverenliyini tam bərpa etmiş Azərbaycanda ilk dəfə keçirilən parlament seçkilərində iştirak etməyin onun üçün böyük fəxr olduğunu vurğulayıb. Namizəd YAP-ın seçki platformasının Prezident İlham Əliyevin daxili və xarici siyasətini dəstəkləmək, ölkəmizdə aparılan islahatlar və regionların sürətli inkişafı siyasətini davam etdirmək olduğunu bildirib. Eyni zamanda, o, hər bir seçicinin fikir və təkliflərinin YAP və dövlət siyasəti üçün çox önəmli olduğunu qeyd edib. Ramil Həsən bütün seçiciləri demokratiyanın simvolu olan seçkilərdə aktiv iştirak etməyə və YAP-ın namizədlərinə səs verməyə çağırıb.
Təbliğat-təşviqat qrupunun üzvləri Mirzalı Ağamalıyev və Yaqut Zeynalova seçiciləri Azərbaycan tarixində ilk dəfə olaraq respublikamızın bütün ərazisində keçiriləcək parlament seçkilərində YAP-ın namizədini dəstəkləməyə çağırıblar.
Görüşlərdə çıxış edən şəhid Ağa Hacıyevin atası Mirismayıl Hacıyev və kənd sakinləri müxtəlif məsələlər ilə bağlı təklif və müraciətlərini səsləndiriblər.
Xatırladaq ki, həmin gün Ramil Həsən Qazyan kəndində Birinci Qarabağ müharibəsi şəhidləri Muxtar İsa oğlu Ağayevin və Vətən müharibəsi şəhidi gizir Vüqar Telman oğlu Ələkbərovun, Yuxarı Şilyan kəndində isə şəhid Təhmiraz Arif oğlu Cavadovun və şəhid Xəlilov Asif Qoca oğlunun ailələrini ziyarət ediblər.
Həmçinin Qazyan və Yuxarı Şilyan kəndlərinin mərkəzində yerləşən şəhidlərin Xatirə lövhələri önünə gül dəstələri qoyulub, Vətənin qəhrəman övladlarının ruhuna dualar oxunub.
