Seçki-2024
Göygöl seçiciləri YAP-ın namizədinə səs verəcək
Azərbaycan Respublikasının Milli Məclisinə keçiriləcək 2024-cü il sentyabrın 1-də növbədənkənar seçkilərin təbliğat-təşviqat mərhələsi çərçivəsində Yeni Azərbaycan Partiyası (YAP) tərəfindən 100 saylı Göygöl-Daşkəsən-Kəlbəcər seçki dairəsindən deputatlığa namizədliyi irəli sürülmüş Kamran Bayramovun Göygöl şəhərində şəhid ailələrinin üzvləri və müharibə iştirakçıları ilə görüşü keçirilib.
Əvvəlcə tədbir iştirakçıları Göygöl şəhərində Ulu Öndər Heydər Əliyevin abidəsini və Şəhidlər xiyabanında şəhidlərimizin məzarlarını ziyarət edib, önünə gül dəstələri düzərək əziz xatirələrini dərin ehtiramla anıblar.
YAP Göygöl rayon təşkilatının qərargahında keçirilən tədbir zamanı əvvəlcə Ulu Öndər Heydər Əliyevin və Azərbaycanın ərazi bütövlüyü uğrunda canlarını qurban vermiş şəhidlərimizin əziz xatirəsi bir dəqiqəlik sükutla yad edilib.
Görüşdə giriş sözü ilə çıxış edən YAP Göygöl rayon təşkilatının sədri Vüqar İsayev Yeni Azərbaycan Partiyasının parlament seçkilərinə “Yeni dövrə yeni Azərbaycanla!” şüarı ilə qatıldığını diqqətə çatdırıb. O, qədirbilən Azərbaycan xalqının hər zaman Ümummilli Lider Heydər Əliyevin müdrik siyasi irsinə sadiq olduğunu və Yeni Azərbaycan Partiyasının bu günədək keçirilən bütün seçkilərdə inamlı qələbə qazandığını bildirib. Partiyanın hər zaman olduğu kimi bu seçkilərə də yüksək səviyyədə hazırlaşdığını vurğulayaraq möhtəşəm qələbə qazanacağına inamını ifadə edib.
Çıxış edən deputatlığa namizəd Kamran Bayramov əvvəlcə Yeni Azərbaycan Partiyasının seçki platforması haqqında ətraflı məlumat verib. Müstəqil Azərbaycan dövlətinin qurucusu, xalqımızın Ümummilli Lideri Heydər Əliyev tərəfindən əsası qoyulmuş və bu gün Azərbaycan Respublikasının Prezidenti, Yeni Azərbaycan Partiyasının Sədri cənab İlham Əliyev tərəfindən həyata keçirilən siyasətin uğurlarından geniş bəhs edərək qeyd edib ki, ölkəmiz dünya miqyasında sürətlə inkişaf edən ölkələr sırasındadır və Prezident İlham Əliyevin rəhbərliyi ilə saysız-hesabsız uğurlara imza atılır.
Kamran Bayramov çıxışında seçiciləri parlament seçkilərində fəal iştirak etməyə çağırıb, deputat seçiləcəyi təqdirdə göstərilən etimadı layiqincə doğrultmağa çalışacağına söz verib.
Tədbirdə təşviqat qrupunun üzvü Dilarə Qazıyeva, şəhid ailəsinin üzvü Günel Namazova, müharibə iştirakçısı Araz Abbasov və digərləri çıxış ediblər. Çıxış edənlər uğurlarımızın davamı naminə növbədənkənar parlament seçkilərində YAP-ın namizədinə səs verəcəklərini bildiriblər.
Qeyd edək ki, K.Bayramov həmçinin Göygöl rayonunun Çaykənd, Qarabulaq, Quşçu və Sarısu kəndlərində də seçicilərlə görüşüb.
