Seçki-2024
Böyük uğurlar irəlidədir
2024-cü il sentyabrın 1-də Azərbaycan Respublikası Milli Məclisinə keçiriləcək növbədənkənar seçkilərin təşviqat mərhələsi çərçivəsində Yeni Azərbaycan Partiyası (YAP) tərəfindən 64 saylı Salyan seçki dairəsi üzrə deputatlığa namizədliyi irəli sürülmüş Sadiq Qurbanovun rayonun Marışlı kəndində seçicilərlə görüşü keçirilib.
Görüşü giriş sözü ilə açan YAP Salyan rayon təşkilatının sədri Elmar Əhmədov qeyd edib ki, zamanın tələbi, xalqın istəyi ilə yaranan və qısa müddətdə ümumxalq partiyasına çevrilən Yeni Azərbaycan Partiyasının bütün uğurlarının arxasında xalqın inamı və bu inamdan irəli gələn dəstək dayanır. O, Azərbaycanın son illərdə qazandığı böyük nailiyyətlərin Yeni Azərbaycan Partiyasının fəaliyyəti ilə bilavasitə bağlı olduğunu deyib.
Çıxış edən deputatlığa namizəd Sadiq Qurbanov əvvəlcə YAP-ın seçki platforması haqqında ətraflı məlumat verib. O bildirib ki, bu gün bütün Azərbaycan xalqı, o cümlədən YAP-ın sıralarında birləşən hər bir üzv qürurludur. Qeyd olunub ki, tarixi Zəfərimiz hər birimizi daha uğurlu gələcək naminə hədəflərin reallığa çevrilməsinə dəstək olmağa çağırır. YAP sözlə əməl birliyi sayəsində cəmiyyətin avanqard qüvvəsi kimi nüfuzunu gündən-günə artırır.
İlk dəfə parlament seçkilərinin ölkəmizin bütün ərazilərində keçirilməsinin vacibliyini diqqətə çatdıran deputatlığa namizəd seçiciləri səsvermə günü fəal iştirak etməyə və ən layiqli namizədə səs verməyə çağırıb.
Tədbirdə çıxış edən Vətən Müharibəsi Qəhrəmanı, şəhid Sübhan Cəbrayılovun anası Ləzifə Cəbrayılova, təşviqat qrupunun üzvləri - Abdulxeyir Nəcəfov, Allahverdi Piriyev, Nəbi İbrahimov və digərləri qeyd ediblər ki, Yeni Azərbaycan Partiyası bu zamana qədər Azərbaycanın inkişafında müstəsna rol oynayıb, bundan sonra da ölkəmizin tərəqqisi naminə reallaşdırılacaq strateji kursa öz töhfəsini verəcək.
Görüş zamanı çıxış edən seçicilər də 1 sentyabr seçkilərində seçki məntəqələrinə gedərək YAP-ın namizədinə səs verəcəklərini vurğulayıblar.
Qeyd edək ki, həmin gün deputatlığa namizəd Sadiq Qurbanov rayonun Marışlı və Seyidsadıqlı kəndlərində seçicilərlə görüşüb, Vətən Müharibəsi Qəhrəmanı, şəhid Sübhan Cəbrayılovun ailəsini ziyarət edib.
