Seçki-2024
Nərimanov rayon seçicilərinin seçimi bəllidir
2024-cü il sentyabrın 1-də Azərbaycan Respublikası Milli Məclisinə keçiriləcək növbədənkənar seçkilərin təşviqat mərhələsi çərçivəsində Yeni Azərbaycan Partiyası tərəfindən 20 saylı Nərimanov ikinci seçki dairəsindən deputatlığa namizədliyi irəli sürülmüş Samir Vəliyevin YAP Nərimanov rayon təşkilatının qərargahında şəhid ailələri, qazilər və müharibə veteranları ilə görüşü keçirilib.
Görüşdə ilk öncə Ulu Öndər Heydər Əliyevin və Azərbaycanın ərazi bütövlüyü uğrunda canlarından keçmiş şəhidlərimizin əziz xatirəsi bir dəqiqəlik sükutla yad edilib.
Görüşü giriş sözü ilə açan YAP Nərimanov rayon təşkilatının sədr müavini Anar Abbasov Vətənimizin bütövlüyü uğrunda canlarını qurban vermiş oğullarımızla xalqımızın hər zaman qürur duyduğunu bildirib. A.Abbasov qeyd edib ki, dövlətimiz və xalqımız şəhidlərimizi daim böyük ehtiramla anır, onların ailələrinə xüsusi hörmətlə yanaşır. Ona görə də bu kateqoriyadan olan vətəndaşlar qarşıdan gələn parlament seçkilərində Yeni Azərbaycan Partiyasının namizədlərini dəstəkləyəcəklər.
Çıxış edən deputatlığa namizəd Samir Vəliyev bildirib ki, Prezident İlham Əliyev ötən dövrdə sadə vətəndaşların, eləcə də şəhid ailələrinin, qazilərin və müharibə veteranlarının yanında olub, onlara mütəmadi qayğı və diqqət göstərib. Məhz bunun nəticəsidir ki, ümumxalq məhəbbətini qazanan cənab İlham Əliyev və YAP xalqın bütün təbəqələri tərəfindən sevilməkdədir.
S.Vəliyev deputat seçiləcəyi təqdirdə həssas təbəqədən olan vətəndaşların istək və arzularını yerinə yetirəcəyinə söz verib.
Görüşdə çıxış edən Nəsimi rayonu Ağbirçəklər Cəmiyyətinin sədri Zərifə Quliyeva və Qarabağ müharibəsi qazisi Vidadi Ağagülov çıxış edərək “YAŞAT” Fondunun yaradılmasının, habelə bu Fonda milyonlarla manat vəsaitin ayrılmasının cənab İlham Əliyevin şəhid ailələri və qazilərə, onların sağlamlığına verdiyi diqqətin göstəricisi olduğunu səsləndiriblər.
