Seçki-2024
Qalib xalqın dəyişməz seçimi Qalib Liderdir!
2024-cü il fevralın 7-də ölkəmizdə keçiriləcək prezident seçkiləri ilə əlaqədar Yeni Azərbaycan Partiyası tərəfindən namizədliyi irəli sürülmüş İlham Heydər oğlu Əliyevin seçkiqabağı təşviqat kampaniyası çərçivəsində Salyan şəhərində, eləcə də Salyan rayonunun Qızılağac kəndində seçicilərlə görüşlər keçirilib.
Əvvəlcə Dövlət Himni səsləndirilib, Ulu Öndər Heydər Əliyevin və Vətən uğrunda canlarından keçən qəhrəman oğulların xatirəsi bir dəqiqəlik sükutla yad edilib.
Görüşlərdə YAP Salyan rayon təşkilatının sədri Elmar Əhmədov, Milli Məclisin deputatı Nizami Səfərov, təşviqat qrupunun üzvləri Sahib Həsənov, Ağabala Ağayev, Allahverdi Piriyev, Əzizağa Məmmədli, Yaqut Ələsgərova və Fərqanə Cəbrayılova çıxış ediblər. Çıxış edənlər Prezident İlham Əliyevin ölkəmizə rəhbərlik etdiyi 20 il ərzində görülən misilsiz işlərdən bəhs edərək Müzəffər Ali Baş Komandanımızın rəhbərliyi ilə 44 günlük Vətən müharibəsində əldə edilən tarixi Zəfərin əhəmiyyətindən danışıblar.
Diqqətə çatdırılıb ki, gələcək inkişaf konsepsiyasının uğurla icrası üçün növbəti dövrdə də cənab İlham Əliyevin ölkəmizə rəhbərlik etməsi olduqca zəruridir. Xalqımız daim dövlətimizin başçısının ətrafında sıx birləşməli, 7 fevralda keçiriləcək prezident seçkilərində bu möhtəşəm siyasətin davamına səs verməlidir.
Görüşlər zamanı çıxış edən seçicilər həyata keçirilən dövlət siyasətini dəstəklədiklərini, seçkilərdə fəal iştirak edərək YAP-ın namizədi, qalib Lider İlham Əliyevə səs verəcəklərini bildiriblər.
