Seçki-2024
Fuad İbrahimov: Bütün vətəndaşlarımızı qalib Liderimiz İlham Əliyevə səs verməyə çağırıram
“Mən əslən Şuşalıyam, bu doğma şəhərdə anadan olmuşam, orada boya-başa çatmışam. Şuşanın gözəl günlərini yaşamışam, həmçinin acınacaqlı günlərini də görmüşəm. Bir çoxları kimi, Şuşadan mən də məcburi köçkün düşmüşdüm”.
Bu fikirləri YAP İdarə Heyətinin üzvü, Əməkdar artist Fuad İbrahimov bildirib.
F.İbrahimov qeyd edib ki, ölkəmiz daim inkişaf edərək böyük uğurlar qazanıb və qürurverici məqamlar həddən artıq çoxdur: “Bu uğurlar həmişə məni və əlbəttə ki, bütün Azərbaycan xalqını sevindirir. Amma yenə də Şuşa həsrəti ilə yaşamaq bizi sarsıdırdı”.
Onun sözlərinə görə, həqiqətən də, bu kədərli hisslərdən azad olmaq, yəni bu gün qalib ölkənin vətəndaşı olmaqdan gözəl heç nə ola bilməz: “Ali Baş Komandan İlham Əliyev Şuşanın işğaldan azad olunduğunu elan edərkən sevincimizin həddi-hüdudu yox idi. Həyatımda bundan gözəl hisslər yaşamamışam. Buna görə biz Prezident İlham Əliyevə borclu və minnətdarıq”.
“Nəhayət, arzularımız reallığa çevrildi. Prezident seçkilərində cənab İlham Əliyevə dəstək olacağıq. Biz qalib xalqın qalib övladlarıyıq. Bütün vətəndaşlarımızı seçkilərdə qalib Liderimiz İlham Əliyevə səs verməyə çağırıram”,- deyə Fuad İbrahimov əlavə edib.