YENİ AZƏRBAYCAN PARTİYASI

“Prezident İlham Əliyev Səudiyyə Ərəbistanının “Əl-Ərəbiyyə” telekanalına müsahibəsində həm ölkəmiz, həm də regionumuzla bağlı olduqca vacib məqamlara toxunub. Azərbaycan Prezidenti hər şeydən öncə ölkəmizin dünyada artan nüfuzunu, gücünü və potensialını xarici auditoriyaya yüksək peşəkarlıqla çatdırıb. Cənubi Qafqazda, Yaxın Şərqdə və dünyada baş verən proseslərə aydınlıq gətirən ölkəmizin başçısı Azərbaycanın regionda qalıcı sülhü, qarşılıqlı maraqlara əsaslanan münasibətləri təşviq etdiyini bir daha diqqətə çatdırdı.  Dünyanın geosiyasi palitrasının sürətlə dəyişdiyi bir zamanda ölkələrin xarici strategiyalarında korrektələr etməsi, yeni istiqamətlər müəyyənləşdirməsi zərurəti yaranıb. Aparıcı dövlətlərin yenidən qızışdırılan “soyuq müharibə”də aktiv iştirakı və inkişaf etməkdə olan ölkələrin də bu prosesə cəlb edilməsi qlobal siyasi gərginliyi artırır, münasibətlərin bəzi hallarda hərbi mütəvidə aydınlaşdırmasına gətirib çıxarır.  Yalnız müstəqil xarici siyasət yürüdən, milli iradəsi güclü olan siyasi liderlər bu prosesdə tarazlaşdırıcı güc rolunu qoruyub saxlayır, balanslı yanaşma sərgiləyirlər. Prezident İlham Əliyevin müsahibəsində bu məqamları aydın görmək mümkündür”.

Bu fikirləri Milli Məclisin deputatı Mehriban Vəliyeva deyib. Onun sözlərinə görə, müsahibədə Qarabağda əldə etdiyimiz tarixi Zəfərdən sonra regionda yaranan reallıqlar, dayanıqlı sülhün və təhlükəsizliyin təmin edilməsi, bəzi Qərb dövlətlərinin Cənubi Qafqazda gərginliyin yaradılmasına hesablanan siyasətləri, həmçinin Azərbaycanın Ermənistan, Suriya, İran və Rusiya ilə münasibətlərinə geniş aydınlıq gətirilib: “Bu müsahibə dünyada baş verən proseslərə Bakının yanaşmasını öyrənmək üçün müfəssəl və etibarlı məlumat bazasıdır. Ölkə başçısının da müsahibəsində qeyd etdiyi kimi, Azərbaycanla Ermənistan arasında avqustun 8-də Vaşinqtonda baş verən hadisələr, əslində, qarşıdurmanın və gərginliyin sonu demək idi. Azərbaycan 30 illik işğala, BMT Təhlükəsizlik Şurasının çıxarmış olduğu qətnamələrə hörmətsiz yanaşmaya son qoydu. Azərbaycan istəsəydi, 44 günlük Vətən müharibəzi zamanı və ya ötən 5 il ərzində hazırda Ermənistan ərazisi sayılan tarixi torpaqlarımızı – Qərbi Zəngəzuru özünə birləşdirə və beləliklə də, tarixi ədalətsizliyi aradan qaldıra bilərdi.  Biz təcavüzkar, işğal edən deyil, öz doğma torpaqlarını azad edən ölkəyik. Təəssüf ki, Ermənistan Azərbaycanın ona etdiyi böyük güzəştləri görməzdən gəlir, Qərb rayonlarımızı Naxçıvanla birləşdirəcək Zəngəzur dəhlizinin açılmasına mane olur. Avqustun 8-də Vaşinqtonda Azərbaycan Prezidenti İlham Əliyevin, ABŞ Prezidenti Donald Trampın və Ermənistanın Baş naziri Nikol Paşinyanın iştirakı ilə sülh müstəvisində ciddi addımlar atıldı. Azərbaycanla Ermənistan arasında razılaşdırılmış sülh sənədi paraflandı, eyni zamanda Zəngəzurdan keçən “Tramp dəhlizi” adlanan kommunikasiya xəttinin açılması ilə bağlı razılaşma əldə edildi. Dəhlizin açılması üçün real addımların atılması digər tərəflərdən asılıdır, vaxtın uzadılması bizdə haqlı narahatlıq yaradır.  İran Prezidenti Məsud Pezeşkian haqqında müsbət fikirlər işlədən ölkəmizin başçısı qeyd etdi ki, onunla çox yaxşı işgüzar münasibətlər qurulub: "O, azərbaycanlıdır. O, mənim kimi eyni qanı daşıyır. Biz eyni dildə danışırıq. Tərcüməçiyə ehtiyacımız yoxdur. O, çox istedadlı insandır". Bununla belə cənab Prezident müsahibəsində İrandakı bəzi siyasi və iqtisadi təhlil aparmaq qabiliyyətini itirənlərə də mesaj göndərdi.  Zəngəzur dəhlizinin açılması heç bir dövlətə qarşı deyil və heç bir dövlətin sərhədini pozmur, xaricə çıxışını məhdudlaşdırmır. Əksinə bu dəhliz regionda yeni iqtisadi canlanma yaradacaqdır. Azərbaycan-Iran münasibətlərində cənab Prezidentin “siyasi müstəvidə diplomatiyası” bütün qeyri-müəyyən fikirlərə nöqtə qoydu. Zəngəzur dəhlizinin, Araz dəhlizinin, ümumiyyətlə alternativ tranzitlərin region üçün əhəmiyyətinə aydınlıq gətirdi. Ermənistan-İran sərhədləri üçün narahatlığa son qoydu. Azərbaycan hərbi qüdrətinin sülh və təhlükəsizlik missiyasını təqdim etdi.

Millət vəkili Azərbaycan Prezidentinin müsahibədə jurnalistin Bakının Suriya ilə münasibətlərinə dair sualına verdiyi cavabı diqqətə çatdırdı: “Məlum oldu ki, Azərbaycanın devrilmiş Bəşər Əsədin rəhbərliyi dövründə Suriya ilə münasibətləri Dəməşqin Ermənistana verdiyi dəstəyə görə heç də rəvan olmayıb. Ölkəmiz Suriyada yeni hakimiyyətə gələn Əhməd Əl Şaraa iqtidarını dəstəkləyir, bu ölkəyə ildə 1,2 milyard kubmetr qazın təchiz edilməsi üzrə razılıq verib. Bu, Suriyanın enerjiyə olan təlabatını müəyyən qədər də olsa, ödəyəcəkdir. Azərbaycanın Yaxın Şərqdə mövqeyinin güclənməsi, ərəb dövlətləri ilə iqtisadi əlaqələrin, xüsusilə BƏƏ və Səudiyyə Ərəbistanının böyük şirkətləri ilə layihələrin həyata keçirilməsi, gələcək perspektivlər Azərbaycanın məhz balanslı çoxvektorlu siyasətindən xəbər verir.  Eyni zamanda Prezident İlham Əliyev müsahibəsində türk dövlətləri arasında birliyin günü-gündən möhkəmləndiyini və bunun sülhə söykəndiyini diqqətə çatdırıb. Cənab İlham Əliyevin müsahibədə yer alan fikirləri Azərbaycanın güclü və ədalətli mövqeyə malik olduğunu nümayiş etdirir. Müsahibədən çıxarılan digər qənaət ondan ibarətdir ki, ölkəmizin dəstəklədiyi, təşəbbüskarı olduğu layihələr regionun geosiyasi arxitekturasını formalaşdırır, sülhə, sabitliyə, əməkdaşlığa xidmət edir”.