Xəbərlər
İbrahim Rəhimpur: Azərbaycan ilə İran arasında əməkdaşlıq vacibdir və hər iki ölkənin xeyrinədir
Azərbaycan ilə İran arasında əməkdaşlıq vacibdir və hər iki ölkənin xeyrinədir.
Bu sözləri AZƏRTAC-a eksklüziv müsahibəsində İran xarici işlər nazirinin Asiya və Okeaniya ölkələri üzrə müavini, İran Prezidentinin Xəzər məsələləri üzrə xüsusi nümayəndəsi İbrahim Rəhimpur deyib.
İ.Rəhimpur bildirib ki, Azərbaycan və İran prezidentlərinin önəmli qarşılıqlı rəsmi səfərlərindən sonra iki ölkə arasında bir çox məsələlər öz həllini tapıb. Dövlətlər arasında əməkdaşlıq yüksək səviyyədə davam etdirilir. Nazirlər səviyyəsində yaxşı əməkdaşlığa başlanılıb və bu əməkdaşlıq bir çox yeni sahələrdə aparılır.
Nazir müavini nəzərə çatdırıb ki, regiondakı vəziyyət və baş verən bəzi mənfi proseslər Azərbaycan-İran əməkdaşlığını zəruri edib. Rəsmi Tehran ilə Bakı arasında hərtərəfli əməkdaşlıq regiondakı problemləri həll edə bilər.
İ.Rəhimpur deyib ki, Azərbaycan və İran bəzi problemli məsələləri artıq bir kənara qoyub əməkdaşlığın inkişafı üçün imkanlardan istifadə etmək əzmindədir. Azərbaycan və İran hazırda bir sıra birgə layihələri həyata keçirir.
Diplomat İran ilə Azərbaycan arasındakı əlaqələrin perspektivini yaxşı gördüyünü qeyd edib.