Xəbərlər
Mövqeyimiz qəti və aydındır
Rüstəm Nağıyev
YAP Gədəbəy rayon təşkilatının sədri
Almaniya dünya siyasətində öz yeri və rolu olan ölkədir. Prezident İlham Əliyevin bu dövlətə səfəri xüsusi əhəmiyyət daşıyır. Azərbaycan lideri səfər zamanı ikitərəfli münasibətlərin pik həddə olduğunu xüsusi qeyd edib. O bildirib ki, son vaxtlar Almaniyaya səfərləri müntəzəm xarakter alıb və Almaniya-Azərbaycan əlaqələri sürətli inkişaf dövrünü yaşayır.
Keçən ilin martında Berlində, iki ay əvvəl Münxendə kansler ilə görüşdüyünü xatırladan dövlət başçısı bildirib: “İkitərəfli gündəlik kifayət qədər genişdir. Almaniya-Azərbaycan əlaqələrinin inkişafı həm ölkələrimiz üçün, həm də bütövlükdə Cənubi Qafqazın inkişafı və sabitliyi üçün çox böyük əhəmiyyət kəsb edir”.
Aprelin 26-da “Petersberq Dialoqu”nda iştirak etmək dəvətə görə Almaniyanın Federal Kansleri Olaf Şoltsa təşəkkürünü bildirən ölkə başçısı qeyd edib ki, “COP29-a ev sahibliyi edəcək ölkə kimi Azərbaycan qlobal tədbirə hazırlığın fəal mərhələsindədir. Hazırlıq üçün bizim bir ildən də az vaxtımız qalırdı. Beləliklə, biz yaxşı nəticələrə nail olmaq üçün əlimizdən gələni edirik.”
Xəzər dənizinin külək enerji potensialının 157 qiqavata bərabər olduğunu bildirən ölkə başçısı artıq bir neçə kontraktın imzalandığını bildirərək gələcəkdə Azərbaycan Avropaya təkcə təbii qaz yox, yaşıl enerjini də ixrac edən ölkəyə çevriləcəyinə əminlik ifadə edib.
Azərbaycan Avropa İttifaqının doqquz üzvü ilə “Strateji Tərəfdaşlıq” haqqında razılaşmalar və bəyannamələr imzaladığını xatırladan cənab İlham Əliyev ümidvar olduğunu bildirib ki, həmin beynəlxalq əlaqələr bizə həmrəyliyi gücləndirməyə imkan verəcək. Enerji resurslarına malik bir ölkənin COP29-a ev sahibliyi etməsinə qısqanc münasibətini əsassız adlandıran ölkə başçısı qeyd etmişdir ki, “Buna görə biz mühakimə olunmalı deyilik. Biz həmin ehtiyatların ölkənin inkişafına, yoxsulluğun və işsizliyin azaldılmasına, yaşıl gündəliklə bağlı tutduğumuz hədəflərə yönəldilməsinə görə dəyərləndirilməliyik.”
Avropa Komissiyasının xahişi əsasında Avropa İttifaqının 12 milyard kubmetr qaz ixrac edildiyini bildirən ölkə başçısı bildirib ki, qeyd edilən Memoranduma əsasən, 2027-ci ilə qədər Avropa İttifaqına ixracımız 20 milyard kubmetrə çatmalıdır. Hamımız anlayırıq ki, bu geosiyasi durumda həmin məsələ Azərbaycanın məsuliyyətli olmağının təzahürüdür, çünki biz qaz hasilatımızın artırılmasına böyük həcmdə sərmayə yatırırıq və Avropaya yeni mənbələrdən daha çox qaz lazımdır. Eyni zamanda, yaşıl gündəliyimiz hələ COP29 qərarından əvvəl icra olunmağa başlanıb.
Cənab İlham Əliyevin bu məntiqli və tutarlı mesajı kifayət qədər aydındır. Yəni ki, bizi tənqid edənlər bilməlidir ki, bu gün dünya hələ də qalıq enerjidən istifadə etməyə məhkumdur. Lakin bu qədər sərvətimiz olsa da, biz dünyanın iqlim təhlükəsizliyinə töhfə vermək, yaşıl enerjiyə keçid sahəsində layihələr icra etmək niyyətindəyik. Ona görə də ölkəmizdə yaranmış əlverişli investisiya mühitindən istifadə edərək yaşıl enerji layihələrinə sərmayə qoymaq daha yaxşı olardı.
Enerji təhlükəsizliyini birmənalı olaraq ölkələrin milli təhlükəsizlik məsələsi hesab edən cənab İlham Əliyev bu sahədə ayrı-seçkilik hallarının olmamasının vacibliyini qeyd edərək “Faydalı qazıntı ilə zəngin olan ölkənin rəhbəri kimi, əlbəttə ki, biz həmin ölkələrin sərmayəni və hasilatı davam etdirmək hüququnu müdafiə edəcəyik, çünki dünyanın buna ehtiyacı var. Lakin, eyni zamanda, artıq qeyd etdiyim kimi faydalı qazıntısı olan ölkələr iqlim dəyişmələri məsələlərinə aid həmrəyliyi nümayiş etdirən ölkələr sırasında olmalıdırlar.”-deyə münasibətini bildirmişdir.
Ölkə başçısının Almaniya səfər bir daha göstərmişdir ki, Azərbaycan öz qəti və aydın mövqeyindi dayanır, ona dost əli uzadan hər kəslə bərabərhüquqlu münasibətdə maraqlıdır.