Xəbərlər
Aqrar sektorun inkişafı: regionların sosial-iqtisadi tərəqqisinin əsas amillərindən biri
Malik Mirzəyev
YAP Lerik rayon təşkilatının sədri
Müasir dünyada kənd təsərrüfatı yalnız ərzaq istehsalı sahəsi deyil, həm də milli təhlükəsizlik, sosial rifah və iqtisadi dayanıqlığın əsas sütunlarından biri hesab olunur. Bir çox ölkələr aqrar sektoru strateji sahə kimi qəbul etsələr də, dövlət tərəfindən kənd təsərrüfatına bu qədər genişmiqyaslı və çoxşaxəli dəstək göstərən ölkələrin sayı çox deyil. Azərbaycan bu baxımdan xüsusi seçilən dövlətlər sırasındadır. Son illərdə ölkədə kənd təsərrüfatının inkişafı istiqamətində həyata keçirilən subsidiyalar, gübrə və yanacaq güzəştləri, texnika təminatı, güzəştli kreditlər və digər mexanizmlər aqrar sektorun inkişafına ciddi təkan vermişdir. Dövlətin aqrar siyasətində əsas məqsəd ərzaq təhlükəsizliyini təmin etmək, kənd yerlərində məşğulluğu artırmaq, fermerlərin gəlirlərini yüksəltmək və qeyri-neft sektorunun inkişafını sürətləndirməkdir. Bu siyasət nəticəsində kənd təsərrüfatı Azərbaycanın iqtisadiyyatında mühüm strateji sahəyə çevrilmişdir.
Prezident İlham Əliyev kənd təsərrüfatı məsələlərinə həsr olunmuş müşavirədə çıxışı zamanı aqrar sahənin ölkə iqtisadiyyatında strateji əhəmiyyət daşıdığını vurğulayıb. Dövlət başçısı qeyd edib ki, qeyri-neft sektorunun inkişafında kənd təsərrüfatının rolu böyükdür və bu sahənin müasir yanaşmalar əsasında inkişaf etdirilməsi əsas prioritetlərdən biridir.
Müşavirədə kənd təsərrüfatında məhsuldarlığın artırılması, fermerlərə göstərilən dövlət dəstəyi, subsidiya mexanizmlərinin təkmilləşdirilməsi və suvarma sistemlərinin yenilənməsi məsələləri geniş müzakirə olunub. Prezident bildirib ki, ərzaq təhlükəsizliyinin təmin edilməsi üçün yerli istehsalın artırılması xüsusi əhəmiyyət kəsb edir. Bununla yanaşı, müasir texnologiyaların tətbiqi, rəqəmsal idarəetmə sistemlərinin genişləndirilməsi və aqrar sahədə innovasiyaların təşviqi vacib istiqamətlər kimi qeyd edilib.
Kənd təsərrüfatı ölkə iqtisadiyyatının vacib sahələrindən biridir. Bu sahə əhalinin ərzaq məhsulları ilə təmin olunmasında mühüm rol oynayır. Aqrar sektorun inkişafı daxili bazarın yerli məhsullarla təmin edilməsinə, idxaldan asılılığın azalmasına və ixrac imkanlarının genişlənməsinə şərait yaradır.İndi ki, dövrdə aqrar sektorun inkişafı hər bir ölkənin iqtisadi siyasətində mühüm yer tutur. Xüsusilə kənd təsərrüfatı ənənələri güclü olan ölkələrdə bu sahənin inkişafı yalnız ərzaq təminatı baxımından deyil, həm də regionların sosial-iqtisadi yüksəlişi, məşğulluğun artırılması və əhalinin rifahının yaxşılaşdırılması baxımından böyük əhəmiyyət daşıyır. Azərbaycanda da aqrar sahənin inkişafı dövlət siyasətinin prioritet istiqamətlərindən biri kimi müəyyən edilib. Prezident İlham Əliyev tərəfindən həyata keçirilən iqtisadi islahatlar çərçivəsində kənd təsərrüfatının modernləşdirilməsi və regionların inkişafı istiqamətində mühüm addımlar atılır.
Azərbaycanda son illərdə kənd təsərrüfatının inkişafı məqsədilə dövlət tərəfindən subsidiyalar ayrılır, fermerlərə güzəştli kreditlər təqdim olunur, kənd təsərrüfatı texnikalarının alınmasına dəstək göstərilir. Bu tədbirlər məhsuldarlığın artmasına və kənd təsərrüfatında müasir texnologiyaların tətbiqinə imkan yaradır. Aqrar sektorun inkişafı regionlarda yeni iş yerlərinin yaradılmasına mühüm təsir göstərir. Kənd yerlərində yaşayan əhalinin böyük hissəsi məhz kənd təsərrüfatı ilə məşğul olur. Əkinçilik, heyvandarlıq, bağçılıq və digər kənd təsərrüfatı sahələrinin genişlənməsi insanların daimi gəlir əldə etməsinə şərait yaradır.
Yeni aqroparkların yaradılması, emal müəssisələrinin tikilməsi və kənd təsərrüfatı məhsullarının istehsal həcminin artırılması regionlarda işsizliyin azalmasına səbəb olur. Bu isə kənddən şəhərə miqrasiyanın qarşısının alınmasına və regionların dayanıqlı inkişafına xidmət edir. Aqrar sektorun inkişafı regionların sosial-iqtisadi tərəqqisinin əsas hərəkətverici qüvvələrindən biridir. Bu sahənin inkişafı yeni iş yerlərinin açılmasına, əhalinin rifahının yüksəlməsinə, ərzaq təhlükəsizliyinin təmin olunmasına və ölkənin iqtisadi potensialının güclənməsinə mühüm töhfə verir. Azərbaycanda həyata keçirilən aqrar islahatlar və dövlət dəstəyi proqramları kənd təsərrüfatının daha da inkişaf etməsinə geniş imkanlar yaradır. Gələcəkdə innovativ texnologiyaların tətbiqi və müasir idarəetmə mexanizmlərinin genişləndirilməsi aqrar sektorun dayanıqlı inkişafını təmin edəcək və regionların sosial-iqtisadi yüksəlişinə mühüm təsir göstərəcək.