Xəbərlər
Xocalı faciəsi: vəhşiliyin ən bariz nümunəsi
Mansur Quliyev
YAP Ağdam rayon təşkilatının sədri
26 Fevral – Xocalı soyqırımı Azərbaycan xalqının yaddaşına qanla yazılmış faciə, eyni zamanda milli həmrəyliyin və ədalətə inamın rəmzidir. 1992-ci ilin fevralında dinc əhaliyə qarşı törədilmiş bu ağır cinayət beynəlxalq humanitar hüququn kobud şəkildə pozulması idi. Uşaq, qadın, qoca demədən yüzlərlə insanın amansızcasına qətlə yetirilməsi bəşəriyyətə qarşı törədilmiş ən ağır cinayətlərdən biri kimi tarixə düşdü.
Azərbaycan dövləti və xalqı bu faciəni heç zaman unutmadı və unutdurmadı. Uzun illər ərzində “Xocalıya ədalət!” şüarı ilə beynəlxalq ictimaiyyətə çağırış edildi, həqiqətlərin dünyaya çatdırılması istiqamətində ardıcıl və sistemli iş aparıldı. Bu, sadəcə siyasi kampaniya deyil, həm də mənəvi borc, tarixi yaddaş məsələsi idi.
Azərbaycan Respublikasının Prezidenti İlham Əliyev Xocalı ilə bağlı fikirlərində xüsusi vurğulamışdır: “Xocalıya ədalət!” tələbimiz tam haqlı idi. Bu ədaləti döyüş meydanında təmin etməyimiz beynəlxalq hüquqa və tarixi ədalətə tam uyğundur. Biz tarixi ədaləti bərpa etmişik. Biz günahsız Xocalı qurbanlarının qisasını döyüş meydanında aldıq, onların qanını döyüş meydanında aldıq, qoymadıq ki, onların qanı yerdə qalsın”.
Bu fikirlər dövlətimizin prinsipial və qətiyyətli mövqeyini ifadə edir. 44 günlük Vətən müharibəsində əldə olunan tarixi Zəfər yalnız torpaqlarımızın işğaldan azad olunması deyil, eyni zamanda illərlə pozulmuş ədalətin bərpası idi. Azərbaycan Ordusu beynəlxalq hüquqa əsaslanaraq öz ərazi bütövlüyünü təmin etdi və bununla da Xocalı qurbanlarının ruhu qarşısında tarixi missiyanı yerinə yetirdi.
Bu gün Xocalı soyqırımı qurbanlarının xatirəsi dərin ehtiramla anılır. Azad olunmuş torpaqlarda aparılan genişmiqyaslı quruculuq və bərpa işləri, doğma yurd yerlərinə Böyük Qayıdış prosesi şəhidlərimizin qanının yerdə qalmadığının bariz nümunəsidir. Azərbaycan xalqı bir daha sübut etdi ki, milli iradə, güclü dövlət və sarsılmaz birlik olduqda tarixi ədaləti bərpa etmək mümkündür.
26 Fevral təkcə hüzn günü deyil, həm də ədalətə aparan yolun rəmzidir. Xocalı qurbanlarının xatirəsi daim qəlbimizdə yaşayacaq, onların qanı bahasına yazılan tarix isə gələcək nəsillər üçün həm dərs, həm də qürur mənbəyi olacaq.