Xəbərlər
Tarixi nailiyyətlər yeni hədəflərin reallaşmasına yol açır
Abil Ağasəfov
YAP Qəbələ rayon təşkilatının sədri
Azərbaycan Respublikasının Prezidenti, Yeni Azərbaycan Partiyasının Sədri İlham Əliyevin Yeni Azərbaycan Partiyasının VIII Qurultayında səsləndirdiyi fikirlər ölkəmizin son onilliklər ərzində keçdiyi möhtəşəm inkişaf yoluna nəzər salmaq, əldə olunan nailiyyətlərin mahiyyətini dərk etmək və qarşıda duran yeni vəzifələri müəyyənləşdirmək baxımından mühüm əhəmiyyət daşıyır. Dövlətimizin başçısının çıxışında Azərbaycanın siyasi, iqtisadi və hərbi qüdrətinin yüksəlməsi, milli həmrəyliyin möhkəmlənməsi və ölkəmizin qarşısında açılan yeni imkanlar xüsusi vurğulanmışdır.
Azərbaycanın bugünkü uğurlarını və tarixi Zəfərini anlamaq üçün ilk növbədə Yeni Azərbaycan Partiyasının yaranmasına və onun keçdiyi şərəfli siyasi yola nəzər salmaq lazımdır. Çünki bu gün əldə etdiyimiz qələbələrin təməlində yalnız güclü ordu, iqtisadi imkanlar və diplomatik uğurlar deyil, həm də möhkəm dövlətçilik ideologiyası və xalqın milli iradəsini ifadə edən siyasi birlik dayanır. Yeni Azərbaycan Partiyasının təsis qurultayının keçirildiyi dövr ölkəmiz üçün olduqca mürəkkəb siyasi mərhələ idi. Azərbaycan ciddi ictimai-siyasi, iqtisadi və sosial problemlərlə üz-üzə qalmışdı. Belə bir şəraitdə xalqın böyük bir hissəsinin Ulu Öndər Heydər Əliyevə müraciət etməsi və onun rəhbərliyi ilə Yeni Azərbaycan Partiyasının yaradılması dövlətimizin gələcək inkişafında tarixi dönüş yaratdı. Ulu Öndər Heydər Əliyevin siyasi uzaqgörənliyi, dövlətçilik təcrübəsi və xalq qarşısındakı böyük nüfuzu Yeni Azərbaycan Partiyasını qısa müddətdə ölkənin aparıcı siyasi qüvvəsinə çevirdi. Partiyanın əsas məqsədləri milli dövlətçiliyin qorunması, Azərbaycanın müstəqilliyinin möhkəmləndirilməsi, ölkədə siyasi sabitliyin və sosial-iqtisadi inkişafın təmin edilməsi idi. Sonrakı illərin hadisələri göstərdi ki, bu məqsədlər Azərbaycanın gələcək uğurlarının möhkəm siyasi əsasını təşkil etmişdir. Ulu Öndərin rəhbərliyi ilə Azərbaycanda sabitliyin təmin edilməsi və inkişaf strategiyasının müəyyənləşdirilməsi ölkəmizin qarşısında yeni imkanlar açdı. Dövlət institutları möhkəmləndirildi, iqtisadiyyatın inkişafı üçün mühüm addımlar atıldı, Azərbaycanın beynəlxalq mövqeləri gücləndirildi. Ən əsası isə milli dövlətçilik düşüncəsi cəmiyyətin əsas dəyərlərindən birinə çevrildi.
Bu siyasi kurs Prezident İlham Əliyev tərəfindən ardıcıl və uğurla davam etdirildi. Ölkəmiz qısa müddət ərzində böyük iqtisadi və sosial inkişaf yolu keçdi, iri infrastruktur layihələri həyata keçirildi, Azərbaycan beynəlxalq münasibətlər sistemində öz mövqeyini daha da möhkəmləndirdi. Eyni zamanda, ordu quruculuğu dövlət siyasətinin əsas prioritetlərindən biri kimi müəyyənləşdirildi. Güclü iqtisadiyyatın güclü ordu üçün əsas yaratması prinsipi əsasında Azərbaycan Silahlı Qüvvələri ən müasir standartlara uyğun şəkildə formalaşdırıldı. Bütün bunlar təsadüfi deyildi. Azərbaycan qarşısına konkret milli məqsəd qoymuşdu – işğal altında olan torpaqlarımızın azad edilməsi və ərazi bütövlüyümüzün bərpası. İllər ərzində həyata keçirilən ardıcıl siyasət nəticəsində ölkəmizin iqtisadi, siyasi və hərbi potensialı əhəmiyyətli dərəcədə artdı. Azərbaycanın beynəlxalq mövqelərinin gücləndirilməsi də bu strategiyanın mühüm istiqamətlərindən biri oldu.
2020-ci ildə baş verən 44 günlük Vətən müharibəsi isə Azərbaycanın çoxillik dövlətçilik siyasətinin və hazırlıq mərhələsinin möhtəşəm nəticəsi oldu. Müzəffər Azərbaycan Ordusu Ali Baş Komandan İlham Əliyevin rəhbərliyi ilə tarixi missiyanı yerinə yetirdi. İşğal altında olan torpaqlarımız azad edildi, Azərbaycan xalqı öz tarixinin ən şanlı səhifələrindən birini yazdı. 2023-cü ildə həyata keçirilən lokal xarakterli antiterror tədbirləri nəticəsində ölkəmizin ərazi bütövlüyü ilə yanaşı, suverenliyi də tam bərpa edildi. Bu tarixi hadisələr göstərdi ki, böyük qələbələr bir gündə əldə olunmur. Zəfərin arxasında illərlə aparılan məqsədyönlü siyasət, dövlət quruculuğu, iqtisadi inkişaf, ordu quruculuğu, diplomatik fəaliyyət və ən başlıcası, xalq-dövlət birliyi dayanır. Bu baxımdan, Azərbaycanın bugünkü qələbələrinin başlanğıc nöqtələrindən biri məhz Yeni Azərbaycan Partiyasının təsis olunması ilə formalaşan siyasi iradə və dövlətçilik xəttidir.
Prezident İlham Əliyevin VIII Qurultaydakı çıxışı da bu baxımdan xüsusi əhəmiyyət daşıyır. Çünki Azərbaycan artıq ərazi bütövlüyünü və suverenliyini tam bərpa etmiş qalib ölkə kimi yeni mərhələyə qədəm qoyub. Qarşıda dayanan əsas vəzifələr əldə edilmiş nailiyyətləri qorumaq, ölkəmizin iqtisadi və sosial inkişafını daha da sürətləndirmək, azad edilmiş ərazilərimizin bərpasını və Böyük Qayıdış prosesini uğurla davam etdirməkdir. Bu gün Qarabağ və Şərqi Zəngəzurda həyata keçirilən genişmiqyaslı quruculuq işləri Azərbaycanın yeni inkişaf mərhələsinin real mənzərəsini ortaya qoyur. İşğaldan azad edilmiş şəhər və kəndlər yenidən qurulur, müasir infrastruktur yaradılır, insanların öz doğma torpaqlarına qayıdışı təmin edilir. Bu proses Azərbaycanın yalnız torpaqlarını deyil, həmin ərazilərdə gələcəyi də bərpa etdiyini göstərir. Yeni Azərbaycan Partiyasının VIII Qurultayı məhz belə bir tarixi mərhələdə keçirilir. Partiyanın qarşısında duran əsas vəzifələrdən biri ölkəmizdə əldə olunan reallıqların cəmiyyətə düzgün çatdırılması, milli həmrəyliyin və dövlətçilik dəyərlərinin daha da möhkəmləndirilməsi, yeni dövrün çağırışlarına uyğun fəaliyyətin təşkilidir. Partiya üzvlərinin üzərinə düşən məsuliyyət də məhz bu mərhələdə daha böyükdür. Bu gün qarşıda daha böyük hədəflər dayanır. Azərbaycan artıq qalib və suveren dövlət kimi yeni inkişaf mərhələsinə daxil olub. Əsas məqsəd əldə edilmiş tarixi nailiyyətləri daha da möhkəmləndirmək, ölkəmizin iqtisadi gücünü artırmaq, sosial rifahı yüksəltmək və Azərbaycanın beynəlxalq nüfuzunu daha da gücləndirməkdir.
Yeni Azərbaycan Partiyasının keçdiyi yol bir daha sübut edir ki, düzgün müəyyənləşdirilmiş siyasi strategiya, xalqın iradəsi və güclü liderlik böyük nəticələrə gətirib çıxarır. Təsis qurultayında qoyulan siyasi əsaslar bu gün Azərbaycanın tarixi Zəfərləri ilə öz təsdiqini tapmışdır. Bu yol davam edir və yeni dövr Azərbaycanın qarşısında daha böyük uğurlar, yeni hədəflər və yeni qələbələr vəd edir.