Xəbərlər
Heydər Əliyev Fondunun təşkilatçılığı ilə UNESCO-nun iqamətgahında Azərbaycan mədəniyyətinə dair sərgi açılır
Mayın 4-də Parisdə, UNESCO-nun iqamətgahında Heydər Əliyev Fondunun təşkilatçılığı ilə “Azərbaycan: ənənədən müasirliyə” adlı sərgi açılacaq.
Fonddan bildiriblər ki, şəhər sakinlərinə və qonaqlara layihə çərçivəsində üç sərgi təqdim olunacaq: “Azərbaycan: ənənədən gələcəyə”, “Bakı-2015” birinci Avropa Oyunlarına həsr olunan sərgi və “Azərbaycan müasir incəsənəti” sərgisi.
Sərginin təşkil olunmasına dair rəsmi mərasim isə “Muzeylər gecəsi” ərəfəsində - mayın 13-də keçiriləcək. Tədbirdə Azərbaycanın gənc caz musiqiçilərinin – Şahin Növrəslinin qrupunun konserti də təqdim olunacaq.
“Azərbaycan: ənənədən gələcəyə” ekspozisiyasında ölkə ərazisində tapılan arxeoloji nümunələr, qədim dövr və orta əsrlərdə Azərbaycanda dövriyyədə istifadə edilən pul sikkələri, zərgərlik nümunələri, mis qablar, milli musiqi alətləri, geyimlər, tikmələr və xalça məmulatları təqdim olunacaq.
“Bakı-2015” birinci Avropa Oyunlarına həsr olunan sərgidə isə ölkəmizin tanınmış heykəltəraşları ilə birlikdə gənc istedadların yarışların keçiriləcəyi 20 idman növü üzrə hazırladıqları kiçik bürünc heykəllər nümayiş etdiriləcək.
“Azərbaycan müasir incəsənəti” sərgisində görkəmli rəssamların əsərləri təqdim olunacaq. Burada Əşrəf Murad, Rasim Babayev, Toğrul Nərimanbəyov, Darvin Vəlibəyov, Məmməd Kərim Quliyev, Altay Sadıqzadə, Sabir Çopuroğlu, Elyar Əlimirzəyev, Müseyib Əmirov, Niyaz Nəcəfov, Orxan Hüseynov və Faiq Əhmədin rəsmləri, Leyla Əliyeva, Kənan Əliyev, Əhəd Məmmədov və Nurlan Məmmədovun heykəltaraşlıq əsərləri nümayiş etdiriləcək.
Mayın 6-da isə UNESCO-nun iqamətgahında Qarabağ atları və UNESCO-nun Qeyri-Maddi Mədəni İrs Siyahısına salınan çövkən oyununa həsr edilən sərginin açılışı, həmçinin fransız yazıçı Jan Lui Quronun “Qarabağ atları” (“Le cheval Karabakh”) kitabının təqdimatı keçiriləcək.
Hər il olduğu kimi, bu il də Avropada mayın 16-da “Muzeylər gecəsi” keçiriləcək. Həmin gün Avropanın əksər muzeylərində giriş pulsuz olur. Paris sakinləri və şəhərin qonaqları bu çərçivədə UNESCO-da təqdim edilən “Azərbaycan: ənənədən müasirliyə” sərgisi ilə sərbəst girişlə tanış ola biləcəklər.
“Azərbaycan: ənənədən müasirliyə” sərgisi mayın 20-dək davam edəcək.