Xəbərlər
YAP Azərbaycanın yüksəlişində mühüm rol oynayıb
Azərbaycan Respublikasında 2025-ci il yanvarın 29-na təyin edilmiş bələdiyyə seçkilərinin təşviqat mərhələsi çərçivəsində Şəki rayonu, Baş Zəyzid və Orta Zəyzid bələdiyyələri üzrə Yeni Azərbaycan Partiyasının (YAP) namizədlərinin seçicilərlə görüşləri keçirilib.
Görüşlərdə çıxış edən YAP Şəki rayon təşkilatının sədr müavini Ziya Vəliyev qeyd edib ki, bələdiyyə seçkiləri regionların sosial-iqtisadi inkişafını təmin etmək baxımından önəmlidir: “Bələdiyyə seçkiləri, həmçinin cəmiyyətin demokratiya dəyərlərini mənimsəməsinə və idarəetmədə şəffaflığın artırılmasına töhfə verir”.
Z.Vəliyevin sözlərinə görə, YAP bu günə kimi Azərbaycanın yüksəlişində mühüm rol oynayıb, bundan sonra da qarşıda duran hədəflərin reallaşdırılmasına öz töhfələrini verəcək.
Təşviqat qrupunun üzvləri Vüqar Qafurov, Heyran Yusifova, Fərrux Kərimli, Çinarə Qurbanova, bələdiyyə üzvlüyünə namizədlər Ələşrəf Müslimov, Filman Nizamov, Ramin Mustafayev, Sevinc Nəsrullayeva, Novruz Musayev, İmran Qasımov, Səfa Mehdiyev, Çinarə İslamova və Sərxan Vahabov YAP-ın seçki proqramı barədə ətraflı məlumat veriblər. YAP-ın namizədləri söz veriblər ki, yeni formalaşacaq bələdiyyələrdə təmsil olunmaq hüququ qazanacaqları halda, öz fəaliyyətlərini günün tələbləri səviyyəsində qurmaqla xalqın xidmətində duracaqlar.
Seçicilər Ələkrəm Məmmədov, Dilarə Məhyəddinova, Gülnar Abdulxalıqova YAP-ın fəaliyyətini dəstəklədiklərini və bələdiyyə seçkilərində partiyanın namizədlərinə səs verəcəklərini vurğulayıblar.
Qeyd edək ki, bələdiyyə üzvlüyünə namizədlər Vərəzət və Qırxbulaq kəndlərində məhəllə görüşləri keçiriblər.
