Xəbərlər
Əməkdaşlığın inkişaf etdiyini təsdiqləyən amillər
Natiq Quluzadə
YAP Zəngilan rayon təşkilatının sədri
Azərbaycan müstəqillik əldə etdikdən sonra aparıcı Qərb dövlətləri ilə münasibətlərini yüksək səviyyədə qurur. Eyni zamanda bir sıra nüfuzlu siyasi təşkilatlarla iş birliyi qurub, eləcə də hərbi alyanslarla münasibətlərini davamlı inkişaf xəttində tənzimləyib. Bu xüsusda ölkəmizin NATO ilə münasibətləri barədə bir sıra mühüm məqamlara toxunmaq olar.
Azərbaycanla NATO arasında əlaqələr 1992-ci ildə Azərbaycanın yeni yaradılan Şimali Atlantika Əməkdaşlıq Alyansına daxil olması ilə başlayıb və sonrakı illərdə inkişaf etdirilib. Belə ki, Azərbaycanın NATO ilə daha sıx əməkdaşlığı 1994-cü ildə Ulu Öndər Heydər Əliyev tərəfindən Brüsseldə “Sülh naminə Tərəfdaşlıq” çərçivə sənədinin imzalanması ilə inkişaf edib. Məhz Heydər Əliyevin 1997-ci il noyabrın 21-də imzaladığı Fərmanına əsasən, Azərbaycanın NATO-da diplomatik nümayəndəliyi təsis olunub və bu gün də həmin nümayəndəlik fəaliyyətini uğurla davam etdirməkdədir.
Xüsusilə qeyd edə bilərik ki, Azərbaycanın xarici siyasət istiqamətlərindən biri də bu hərbi alyansa inteqrasiyası ilə bağlıdır. Belə ki, ölkəmiz 1994-cü ildən NATO-nun “Sülh naminə tərəfdaşlıq” proqramına qoşulub, 1999-cu ildə NATO Parlament Assambleyasına müşahidəçi, 2002-ci ildən isə assosiativ üzv statusu alıb, 2004-cü ildən “Fərdi tərəfdaşlıq” proqramlarına qoşulub. Bütün bunlar Azərbaycan-NATO münasibətlərinin yüksələn xətlə inkişaf etdiyini göstərir. Azərbaycan Prezidenti İlham Əliyevin NATO ilə Azərbaycan arasında əməkdaşlığa daim önəm verib və əbəs deyil ki, 2004-cü ildə ölkəmiz qurumun Fərdi Tərəfdaşlıq Fəaliyyət Planına qoşulduğu üçün münasibətlər daha da genişləndirilir.
Martın 17-də ölkəmizdə səfərdə olan NATO Baş katibi Yens Stoltenberq yüksək səviyyədə qəbul edilmiş, əməkdaşlıq məsələləri və Azərbaycan –NATO münasibətləri müzakirə edilmişdir. Daha sonra Azərbaycan Respublikasının Prezidenti İlham Əliyev və NATO-nun Baş katibi Yens Stoltenberq mətbuata bəyanatla çıxış ediblər.
Ölkəmizin başçısı İlham Əliyev çıxışında qeyd edib ki, Azərbaycan-NATO tərəfdaşlığının 30 ildən artıq davam edən uzun tarixi var. Bu müddətdə tərəfdaşlığın müsbət nəticələri olmuşdur. NATO-nun bir sıra əməliyyatlarında iştirak edən Azərbaycan güclü əməkdaşlığa sadiq tərəfdaş kimi qeyd edilmişdir.
Hazırda Ermənistan-Azərbaycan münasibətlərinə toxunan cənab Prezident bildirib ki, sülh danışıqlarına başlamaq bizim təşəbbüsümüz olub və “biz sülhə heç vaxt olmadığımız qədər yaxınıq.”
Cənab Prezident daha sonra bildirib ki, Azərbaycan hazırda 8 Avropa ölkəsinə qaz nəql edir ki, bu dövlətlərdən 6-sı NATO üzvüdür. Ölkəmizin ümumavropa qaz təchizatçısı adlandırılası böyük üstünlük olsa da, həm də ciddi məsuliyyət tələb edir. Bununla yanaşı, iqlim dəyişikliklərinə töhfə verməyə çalışan ölkəmzin COP29-a ev sahibliyi edəcəyini diqqətə çatdıran cənab Prezident NATO Baş katibini payızda keçiriləcək konfransa dəvət etmişdir.
Sadalananlar Azərbaycanla Alyans arasında əməkdaşlığı əks etdirən çoxsaylı faktların bir qismidir. Tərəflər arasında əməkdaşlıq davam və inkişaf edir. Bütün bu reallıqlar Azərbaycanla NATO arasında əməkdaşlığın inkişaf etdiyini təsdiqləyən amillərdir.