Xəbərlər
Qalib Lider ölkəni yeni zirvələrə yüksəldəcək
Zəngilanlı seçicilərlə görüş keçirilib
2024-cü il fevralın 7-də ölkəmizdə keçiriləcək prezident seçkiləri ilə əlaqədar Yeni Azərbaycan Partiyası tərəfindən namizədliyi irəli sürülmüş İlham Heydər oğlu Əliyevin seçkiqabağı təşviqat kampaniyası çərçivəsində yanvarın 23-də Binəqədi rayonu ərazisində məskunlaşmış zəngilanlı seçicilərlə görüş keçirilib.
Əvvəlcə Azərbaycanın Dövlət Himni səsləndirilib, Ulu Öndər Heydər Əliyevin və Azərbaycanın ərazi bütövlüyü uğrunda canlarını qurban vermiş şəhidlərimizin əziz xatirəsi bir dəqiqəlik sükutla yad edilib.
Daha sonra cənab İlham Əliyevin 20 illik prezidentlik fəaliyyətinə həsr olunmuş videoçarx nümayiş etdirilib.
Görüşdə YAP Zəngilan rayon təşkilatının sədri Natiq Quluzadə, təşviqat qrupunun üzvləri Fizuli Hüseynov, Oktyabr İsgəndərov və Xuduş İsgəndərov çıxış ediblər.
Natiqlər cənab İlham Əliyevin 20 illik fəaliyyəti dövründə ölkəmizin ordu quruculuğu, təhsil, gənclər-idman, iqtisadi inkişaf, inzibati idarəçilik, xarici siyasət və digər sahələrdə sürətli inkişafı, əldə etdiyimiz böyük uğurlar, misilsiz və qürurverici qələbələrdən bəhs edib, 7 fevral tarixində keçiriləcək prezident seçkilərində Yeni Azərbaycan Partiyasının namizədi cənab İlham Əliyevə səs verməyə çağırıblar.
Sonda Yeni Azərbaycan Partiyasının Himni səsləndirilib.
