YENİ AZƏRBAYCAN PARTİYASI

Zərifə Quliyeva

YAP Veteranlar Şurasının üzvü

Bəli, Azərbaycan öz şanlı tarixində daha bir ilk yaşayacaq. Gələn ilin 7 fevral tarixində müstəqillik əldə etdiyimizdən bəri ilk dəfə olaraq bütün Azərbaycan ərazisində seçkilər keçiriləcək. Azərbaycanın bütün ərazisində səsvermə məntəqələri qurulacaq, doğma Qarabağımızda, qədim Xankəndimizdə Azərbaycan vətəndaşları səs verəcəklər. Bu 7 fevral tarixi həm də 44 günlük müharibəqə qazandığımız tarixi səlnaməmizin hüququ və siyasi möhürü olacaq. Çünki növbədənkənar prezident seçkilərinin keçirilməsi, hər şeydən əvvəl, əldə etdiyimiz tarixi zəfər və onun yaratdığı yeni reallıqlarla sıx əlaqədardır. Cəmi üç il bundan əvvəl Azərbaycan tarixi zəfər əldə edərək ərazi bütövlüyünü bərpa etdi. Bu ilin sentyabr ayının 19-20-də həyata keçirilən lokal antiterror tədbirləri nəticəsində isə, Xankəndidə yuva salmış erməni separatçı cinayətkar xuntasının məhv edilməsi ilə Azərbaycanın hər qarış ərazisində onun suveren hüquqlarının bərpa olunması uğurla başa çatdı. Bu şanlı zəfər tariximizin baş memarı isə heç şübhəsiz ki, qəhrəman Azərbaycan oğulları və böyük əzmkarlığı, Ali Baş Komandan kimi yüksək zəkası və qətiyyəti ilə 44 günlük müharibənin qələbə ilə başa çatması üçün xarizmatik lider bacarığı nümayiş etdirən Prezident İlham Əliyevdir. 44 günlük müharibə zamanı təkcə hərbi Komandan kimi cəbhə xəttində deyil, eyni zamanda diplomatik və informasiya müharibəsində də güclü xarizması və mübarizəsi ilə dünyanın heyran qaldığı cənab İlham Əliyev, Ali Baş Komandan kimi Azərbaycan xalqına verdiyi sözə Azərbaycanın bütün ərazilərində suverenliyimizi təmin etməklə, 30 illik erməni işğalına son qoymaqla və bütün dünyanın Azərbaycan reallıqı ilə barışmasını təmin etməklə əməl etdi.

Prezident İlham Əliyev Azərbaycanın suverenliyinin tam təmin edilməsindən sonra Xankəndidə, Xocalıda, Ağdərədə, Xocavənddə Azərbaycan Bayrağını ucaldıb, Xankəndidən xalqa müraciətində son 20 ildə verdiyi bütün vədlərin, qarşıya qoyulan vəzifələrin icra edildiyini böyük qürur hissi ilə bildirdi. Bu, çağdaş Azərbaycan tarixində analoqsuz möhtəşəm tarixi gün kimi yaddaşlara yazıldı. Növbədənkənar prezident seçkilərini şərtləndirən mühüm amillərdən biri məhz Azərbaycanın ərazi bütövlüyünün və suverenliyinin tam təmin edilməsidir.

Bu gün bütün işğaldan azad edilmiş ərazilərimizdə qalibiyyət rəmzi olan üçrəngli bayrağımız dalğalanır, bu torpaqlarda genişmiqyaslı bərpa-quruculuq işləri həyata keçirilir, soydaşlarımız mərhələ-mərhələ doğma yurd-yuvalarına qayıdırlar. Qayıdış ünvanlarının sıralanması genişlənir. Bu sadaladıqlarımız isə, əlbəttə, xalqımız qarşısında duran yeni milli çağırışlar kontekstində, sırf hüquqi baxımdan Azərbaycanın hər qarış ərazisində suveren hüquqlarının təmin olunması baxımından yeni siyasi sifarişlər meydana çıxarır. Çünki əgər 2020-ci ilə qədər ölkədaxili siyasi instututların hamısının əsas məqsədlərindən biri ərazi bütövlüyümüzün bərpa olunması idisə, o artıq 2020-ci ildə həll edildi. Əgər 2020-ci ildən sonra Azərbaycanın suveren hüquqlarının onun hər qarış ərazisində bərpa olunması yenə də daxili siyasi aktorlarımızın əsas hədəflərindən biri idisə, bu gün artıq o problem də həll olunub. Dolayısı ilə yeni şərtlər həm də yeni prezident seçkilərinin keçirilməsini zəruri edir. Artıq tam əminliklə demək olar ki, prezident seçkilərinin keçirilməsi Azərbaycan dövlətçiliyinin inkişaf tarixinin yeni bir mərhələsidir. Beləliklə, fevralın 7-də keçiriləcək növbədənkənar prezident seçkiləri ilk növbədə Müzəffər Ali Baş Komandan, Prezident İlham Əliyevin özünə inamının, xalqın siyasi dəstəyinə əminliyinin göstəricisidir. Xalqımız da Qarabağı Azərbaycana qovuşduran, dədə-baba torpaqlarımızın həsrətinə son qoyan Müzəffər Ali Baş Komandan, qalib sərkərdə İlham Əliyevə tam dəstək göstərərək xalqın layiqli liderinə səs verəcək. 7 fevral həm də Zəfər salnaməmizin yeni səhifəsi olacaq. Öz qalib Prezidentinə xalqın möhtəşəm dəstəyinin parlaq səhifəsi.